O Concello de Xinzo de Limia e a Universidad Nacional de Educación a Distancia (Uned) colaboran para romper as barreiras de comunicación existentes entre as persoas xordas e oíntes. Un curso de lingua de signos chegará á Casa da Cultura do 11 de outubro ao 4 de novembro para concienciar sobre a importancia de coñecer o mundo das persoas que deben empregar esta linguaxe.
As sesións desenvolveranse de forma presencial e os interesados poden inscribirse na páxina web da Uned. Serán impartidas por un intérprete desta lingua e terán unha duración de dúas horas e media divididas en 12 sesións. O obxectivo é que o alumnado adquira contido e ferramentas básicas para poder compensar as diferenzas lingüísticas entre a lingua oral e a de signos, e manter con certa fluidez conversas básicas sobre cuestións da vida cotiá.
Alberto Martínez, concelleiro de Servizos Sociais, destaca a importancia desta iniciativa, “xa que hai que coñecer outras realidades para así poder romper barreiras e aprender linguaxe de signos é como aprender outro idioma, o idioma das persoas que non teñen voz”.
