Os delitos de tipo telemático continúan incrementándose en Xinzo, aínda que a boa noticia pasa, en materia de seguridade, polo descenso dos delitos graves e menos graves contra o patrimonio. Trátase de conclusións extraídas da Xunta Local de Seguridade que este mércores, día 2 de febrero, celebrouse no Salón de Plenos do Concello de Xinzo. A ela acudiron as forzas e corpos de seguridade locais e representantes municipais, así como a alcaldesa de Xinzo, Elvira Lama, e o subdelegado do Goberno en Ourense, Emilio González.
En canto aos datos rexistrados no Sistema de Seguimento Integral dos casos de Violencia de Xénero -Sistema VioGén-, actualmente no concello de Xinzo de Limia hai activos dez casos. Deles, un presenta risco medio, cinco risco baixo e catro risco non apreciado e todos contan con medidas xudiciais de prohibición de aproximación e comunicación. Seis casos foron asignados á Garda Civil e catro á Policía Local.
No tocante ao Plan Director para a Convivencia e Mellora da Seguridade nos Centros Educativos e nas súas contornas, incrementarase a colaboración cos mesmos para impulsar os recursos cos que informar e formar sobre acoso escolar, uso das novas tecnoloxías, consumo de drogas e alcol, violencia de xénero ou condutas incívicas, entre outras. Neste senso, manterase a vixilancia nas inmediacións dos centros escolares para combater e previr o tráfico, consumo e tenencia de drogas, así como todo tipo de condutas violentas.
Por último, na Xunta Local de Seguridade acordouse a elaboración dun plan de seguridade coordinado entre a Garda Civil, a Policía Local e Protección Civil de cara ás próximas festas do Entroido.
