Dúas mesas redondas centrarán os contidos da vindeira Xornada Sociosanitaria organizada dende o centro de saúde de Xinzo de Limia e que terá lugar o día 5 de xuño na Casa da Cultura da vila. A iniciativa, que levará por título “Acompañando ao longo da vida” e que xurdiu como punto de encontro dos axentes que atenden a pacientes pluripatolóxicos, comezará ás 09,45 horas coa presentación da alcaldesa de Xinzo, Elvira Lama.
A primeira mesa xirará en torno aos procedementos nos coidados do paciente e trataranse temas como a morte eticamente asistida ou a nutrición en persoas maiores e en pacientes en situación paliativa. Na segunda mesa serán protagonistas as vivencias de médicos, traballadores sociais e incluso de familiares de pacientes que falarán de asuntos como os prexuízos en coidados paliativos. A clausura correrá a cargo de Félix Rubial.
