A formación, que inclúe prácticas en empresas, terá unha duración de cinco meses e abordará a temática de Instalacións e Mantemento de Xardíns
Un dos institutos de ensino secundario de Xinzo de Limia, o Cidade de Antioquía, acollerá nos vindeiros meses un curso para desempregados. Este ciclo formativo é froito dun convenio entre a Consellería de Economía, Emprego e Industria e a Consellería de Educación.
Todos os que desexen inscribirse terán que facelo nos vindeiros días no Servizo Público de Emprego de Xinzo.
A formación terá unha duración de cinco meses e abordará a temática de Instalacións e Mantemento de Xardíns. Inclúe un programa de prácticas en empresas e ao remate do curso, os participantes obterán un certificado de profesionalidade.
Terán prioridade para entrar aqueles parados de longa duración, menores de 30 anos de idade.
Becas Erasmus
Por outra banda, este centro educativo ven de recibir varias becas erasmus para mestres e alumnos de ciclo formativo. Un dos educadores viaxará a Bosnia despois de Semana Santa e outro irá á India. O obxectivo desta viaxe é o de coñecer, en primeira persoa, didácticas diferentes á propia, facer novos contactos e mostrar a forma de traballar dos centros de ensino galego.
Do mesmo xeito, dous alumnos do ciclo formativo de forestais do mesmo instituto viaxarán a Holanda o vindeiro mes de abril.
