O Concello de Rairiz de Veiga aprobou unha bolsa de emprego para a contratación temporal de auxiliares para o servizo de axuda no fogar durante os anos 2024 ata 2027.
Esta bolsa de emprego realizarase cando sexa necesario para a prestación do servizo de axuda no fogar, tamén por aumento de horas concedidas de prestación do servizo de axuda no fogar na modalidade de dependencia, ou cando se trate de cubrir baixas, vacacións, permisos e outros ceses temporais de prestación do servizo dos traballadores actuais.
Esta medida xustifícase debido a necesidade do concello de Rairiz de Veiga de contar cunha bolsa de emprego que facilite a inmediata contratación de persoas para a prestación do servizo de axuda a domicilio no caso de contar con máis horas concedidas.
A maiores, esta bolsa de emprego servirá para, no caso da prestación do servizo de dependencia, contar con máis recursos para unha maior prestación do servizo ou cubrir e non deixar o servizo descuberto no caso de ausencia dos traballadores actuais por calquera dos supostos establecidos na lexislación actual.
Solicitación
O prazo e lugar para a presentación de solicitudes son de cinco días naturais que contarán a partir de hoxe, no Rexistro xeral do Concello, de luns a venres, en horario de 09,30 horas a 13,30 horas.
