Que significa para a Sección Antela recibir este distintivo?
Xunto con poder ter recuperado estes humidais na Limia, é unha grande satisfacción este recoñecemento do Museo da Limia e da comarca limiá. O que estamos facendo é bo para o medioambiente, pero tamén bo para a sociedade e para os limiaos.
En que están traballando agora?
Agora mesmo estamos traballando nunha antiga areeira, que está abandonada. Atópase entre Vilar de Santos e Sandiás. Tamén temos pedida a participación nun proxecto “Life” para poder seguir intervindo na Veiga de Gomareite, ampliar e rematar os traballos alí.
Moitos destes traballos saen adiante grazas á colaboración desinteresada dos socios, podería facerse moito máis con máis axuda das administracións públicas?
Pois si, botamos en falta máis implicación das administracións. A decisión de crear a Sección Antela no 2011 foi dar un paso á fronte neste senso. Logo de publicar o libro “A memoria asolagada”, en 1997, tiñan pasado 14 anos e, dende as administracións públicas, non se facía nada. Por iso decidimos facelo nós. Camiñamos pouco a pouco: “Un grao non fai graneiro, pero axuda ao compañeiro”. É un traballo enorme, feito con moi poucos medios, pero con resultados marabillosos.
É importante que os veciños saiban o que se perdeu e o que se pode recuperar?
Si, e tamén o que se pode facer sen perxudicar a ninguén, ao contrario, a nosa colaboración con Samuel Formoso -gandeiro que colaborou na recuperación da Veiga de Gomareite e que emprega a zona como espazo de gandeiría en extensivo- é unha simbiose perfecta: É boa para o medioambiente, para a auga, para o gando de Samuel, para fixar poboación no rural… Xuntos somos máis fortes e así podemos acadar máis metas.
Que plans teñen a corto prazo?
Temos máis actuacións previstas nos 84 predios do Bantegal. Temos máis ideas para as veigas de Rairiz, Vilaseca e Vilar de Santos. Para nós o modelo a seguir é a colaboración entre a Sección Antela e Samuel. Pódese realizar en máis lugares.
Divulgar o voso proxecto entre os máis cativos é tamén importante.
Si, levamos feito moito nese senso. O conto de A historia de Antela contada por unha cegoña e A memoria asolagada presentaronse en Xinzo, realizáronse charlas divulgativas nos distintos colexios e institutos.
