Delas, 446 reservaranse para docencia, 344 corresponderán a persoal sanitario e 373 á Administración xeral da comunidade.
O presidente da Xunta, Alberto Núñez Feijóo, anunciou este xoves a "maior" oferta de emprego público en Galicia dende o ano 2009 e que alcanzará as 1.163 novas prazas. Delas, 446 reservaranse para docencia, 344 corresponderán a persoal sanitario e 373 á Administración xeral da comunidade.
Tras a reunión semanal do seu Executivo, a falta de tres meses e medio para as eleccións municipais de maio, o presidente anunciou que a Administración autonómica esgotará as novas taxas de reposición permitidas por Madrid (do 50 por cento en vez do 10 por cento, como se limitara previamente).
No ámbito da Administración xeral, avanzou que se potenciarán as áreas de loita contra a fraude fiscal, asesoramento xurídico, gardacostas, veterinaria e inspección urbanística, entre outras. Agora activaranse as mesas de negociación para concretar "en detalle" cuestións como as bases e as características de cada convocatoria.
