As estampas doutras romarías reactivan a festa en Vilanova dos Infantes

A música foi , sen sequera facer acto de presencia, a protagonista no regreso de Raigame a Vilanova dos Infantes. A banda do pobo recibiu, de man da organización da romaría etnográfica liderada polo Concello de Celanova, a Deputación de Ourense e o Centro da Cultura Popular Xaquín Lourenzo, o premio honorífico "Adolfo Enríquez" polo seu 160 aniversario, que non se puido celebrar no 2020, e por estar sempre ao pé do canón nas celebracións locais, dende Santa Ana ao Cristal e máis recentemente na propia Raigame. "Para nós este é un recoñecemento moi grande a nosa bandiña que sempre foi humilde, pero seguiremos estando aí para seguir poñendo o noso gran de area na faceta cultural da zona e de Galicia", dixo Julio Rodríguez, novo presidente da asociación cultural que leva a banda e que hoxe está en pleno proceso de reestruturación e de procura dun director. O encargado de facerlles entrega do galardón foi o tenente de alcalde celanovés, Javier Fernández Pulido, quen destacou a traxectoria dunha agrupación creada no ano 1860 tras a unión das charangas do Farruco e do Hixinio, e que nunca deixou de tocar, "nin sequera nos tempos da Guerra Civil", subliñaban. Ao redor da Praza Maior congregáronse varias ducias de veciños, orgullosos do recoñecemento aos seus músicos e mesmo residentes e compañeiros de Celanova, que non dubidaron en felicitar e mostrar o seu apoio aos galardoados, deixando atrás vellas rivalidades. Visita teatralizada As rúas do burgo medieval amenceron cun brillo e un realce especial, o que lle outorgaban a vintena de imaxes de edicións pasadas, colgadas de fachadas e balcóns lembrando aos veciños e visitantes o bulicio e a festa de Días das Letras pasados. Vinte anos despois da primeira edición, e tras o parón forzoso do 2020 polo coronavirus, onte a organización quixo recuperar así o espírito da romaría, non faltando na programación o "photo-call" ambientado no primeiro cuarto do século XX, os concursos de fotografía, investigación etnográfica e micro-vídeos e a edición dixital do xornal Raigame. A actividade máis concorrida do programa de onte foi, sen dúbida, a visita teatralizada "Unha historia para contar" que terá un segundo pase o sábado 22 de maio. Da man de Platea Lúa, e previa reserva, un grupo de persoas tivo a oportunidade de coñecer o burgo medieval seguindo as conversas dun zapateiro artesán e da fotógrafa estadounidense Ruth Matilda Anderson quen, a principios do século pasado, visitou Celanova no seu percorrido por diferentes pobos e cidades galegas. Non foron eles os únicos paseantes polo enxame de rúas e prazas que conforman o burgo medieval. Durante a xornada primaveral de onte, foron moitos os visitantes ourensáns e mesmo de outros recunchos da Galicia, que desprazáronse ata Vilanova para desfrutar da súa historia e beleza.