Sandra González: "Queremos que Rebulir sirva para que os mozos se asenten no rural"

Sandra González tomou o testigo de Alexandre Sotelino ao fronte da Asociación Cultural Rebulir de Ramirás. Un colectivo do que forma parte dende os seus inicios no ano 2005 e no cal sempre colaborou e participou de forma activa, nos postos de organización e tamén como alumna. Como afronta este novo reto ao fronte do colectivo? Liderar Rebulir, ademais dun fermoso reto, é un orgullo xa que e unha asociación situada no concello do que son e no que vivo, Ramirás; e coa que fun medrando a nivel persoal e profesional. A día de hoxe, Rebulir ten unha bagaxe no eido da cultura tradicional, eventos e actividades que hai que seguir realizando de xeito óptimo e un número de socios e socias significativo que pretendemos, siga medrando. Aínda así, a responsabilidade nesta asociación foi, é e sempre será compartida e as decisións seguiranse tomando de xeito democrático e contando, sempre tamén, coa opinión de todos aqueles que formamos parte deste colectivo. Por iso, a responsabilidade parece moita pero non é tanta! Que proxectos gustaríalle desenvolver? Pola miña formación e bagaxe profesional, gustaríame continuar e realizar máis actividades en relación coas expresións culturais e a cultura tradicional como xa fixemos este ano co Certame Identificarte. Tamén considero necesario poñer en valor, recoller, coñecer e difundir o patrimonio cultural, as tradicións e as costumes da nosa zona. Así mesmo, para poder seguir facendo gala do noso folclore e mellorando a nosa calidade, é unha prioridade seguir aprendendo con novos cursos de formación no eido da música e do baile tradicional. Por último, e tamén sabendo que Rebulir é unha asociación de carácter interxeracional, gustaríame sacarlle aínda máis proveito a este contacto entre os distintos colectivos de idade e orixe que forman a nosa asociación. Como se presenta o curso que acaban de arrincar? Este ano mantemos a oferta de gaita e percusión, canto e pandeireta, acordeón e baile tradicional, aínda que nalgún caso tivemos que ampliar aulas e horarios. Seguiremos potenciando o Festival Internacional Rebulir que, se a situación o permite, será do 16 ao 18 de decembro, así como desenvolvendo actividades para crianzas e maiores en relación coas datas máis significativas do noso calendario festivo: O Magosto, O Entroido, Reis e Os Maios. De cara a primavera, temos algunhas ideas na cabeza que nos permitirán reunirnos e desfrutar da música e do baile tradicional como xa o fixemos en anos anteriores. E, por último, seguiremos levando a cabo cursos de formación demandados polos nosos socios e socias en relación coa cultura, a música e a etnografía. Despois de 16 anos e unha pandemia, cara a onde cre que debería ir o colectivo Rebulir? Considero que temos que seguir con ese carácter asociativo que nos caracteriza, seguir medrando sen perder as nosas raíces, potenciar e dar a ver o papel dos mozos no rural amosando que somos capaces de dinamizar a nosa contorna e crear alternativas socioeducativas e actividades de lecer. Gustaríanos que Rebulir servise como ferramenta para coñecer o rural e as posibilidades que este ten e deste xeito, asentar poboación moza na nosa contorna. Por outra banda, en Rebulir cremos que o traballo en rede é necesario, preciso e produtivo. Por iso, consideramos necesario colaborar con outros colectivos ou asociacións da zona que traballen ou non en relación coa cultura tradicional para sumar esforzos e desenvolver novos proxectos.