O fundador da multinacional Inditex, Amancio Ortega, ingresará este exercicio 591,36 millóns de euros en concepto de dividendos da compañía como primeiro accionista do grupo, cunha participación do 59,294% a través das sociedades Gartler e Partler.
O consello de administración de Inditex proporá á xunta xeral de accionistas o pagamento dun dividendo de 1,60 euros por acción, un 33% superior ao do ano anterior. O abono efectuarase en dúas partes de 0,80 euros o 2 de maio (dividendo a conta) e o 2 de novembro (dividendos complementario e extraordinario).
En calidade de presidente do consello de administración do grupo, Amancio Ortega percibe unha cantidade fixa anual de 600.000 euros, a única retribución que recibe da sociedade por todos os conceptos.
Segundo recolle o informe de goberno corporativo de Inditex, os dous conselleiros executivos da compañía, Amancio Ortega e Pablo Isla, cobraron o pasado exercicio 4,39 millóns de euros.
En conxunto, os membros do consello de administración percibiron 5,426 millóns de euros no exercicio 2010, o que supón un lixeiro incremento do 0,29% respecto aos 5,41 millóns do ano anterior.
SOBE A REMUNERACIÓN Á ALTA DIRECCIÓN
Por outro lado, os 21 altos directivos que non son conselleiros da multinacional cobraron 12,66 millóns de euros, o que supón un aumento do 15,93% respecto ao ano anterior, cando a alta dirección contaba cunha persoa menos.
Durante o exercicio 2010, Inditex aprobou un Plan de Incentivo a longo prazo dirixido a membros do equipo directivo e outros 'empregados clave' do grupo.
A compañía estima que, no exercicio fiscal, o importe percibido do incentivo asignado a conselleiros e directivos, que se aboaría sempre que se cumpran as condicións previstas no plan, ascende a 2,25 millóns de euros no caso dos conselleiros e a 3,84 millóns no caso dos directivos.
