O secretario xeral do PSdeG, José Ramón Gómez Besteiro, reclamou 'transparencia e claridade' sobre o proceso de poxa do Novagalicia Banco e manifestou que a Fiscalía 'xa ten que estar atenta' sobre este asunto.
O BNG presentou hoxe un escrito perante o Tribunal Superior de xustiza de Galicia para que traslade á Fiscalía Anticorrupción a súa petición de investigación pola posible comisión de delitos penais na venda do Novagalicia Banco.
Perante as preguntas dos xornalistas sobre se o PSdeG tomará algunha iniciativa neste sentido, o dirixente socialista indicou que a súa formación apostara por non adiantar a poxa da entidade, que podería continuar 'perfectamente' sen ser vendida até que concluíse o prazo en 2017.
'Foi o PP, sen explicalo, quen decidiu' a poxa, que supuxo a perda dunha 'das esencias que tanto defendían' os populares, que a entidade continuase a ser galega, o que agora non é, despois de ser vendida ao venezolano Banesco.
'En todo o caso, hai que facer un seguimento agora' sobre 'que vai acontecer coa diferenza de diñeiro que puxeron todos os contribuíntes e que esperemos que sexan satisfeitos', os 9.000 millóns de fondos públicos achegados á entidade.
Igualmente, avogou por que se dea unha solución 'rápida e clara' ao problema das preferentes e tamén indicou que hai que analizar se a operación 'vén con pulmón' para facilitar crédito en Galicia.
'Hai determinadas cousas que xa se despexaron: a nova entidade non vai ser galega, aínda que o seu ámbito de actuación vaia ser preferentemente Galicia', a pesar das promesas neste sentido do presidente da Xunta, Alberto Núñez Feijóo, dixo.
Gómez Besteiro lembrou que recentemente se publicou que un empresario galego comprou un inmoble no estranxeiro, dixo en referencia a que Amancio Ortega adquiriu un histórico edificio no centro de Londres por 400 millóns de libras (477 millóns de euros).
'Hai que saber se se foi capaz de atraer o poder financeiro galego para que sirva para Galicia', sinalou Besteiro, que dixo que confía en que se dean explicacións sobre o proceso de venda da entidade 'con claridade e transparencia, e a partir de aí o Partido Socialista seguirá' este asunto 'dunha forma rigorosa para ver en que desemboca toda esta operación'.
Ao ser preguntado por se considera que a Fiscalía debería abrir unha investigación, apuntou que, 'nestas cuestións, o Ministerio público xa ten que estar atento: se houbo claridade sobre a transparencia da poxa, que seguimento se vai facer aos recursos públicos que foron investidos no seu día, máis de nove mil millóns'.
De todo o proceso teñen que dar explicacións tanto o Ministerio de Economía como a Xunta, apuntou Besteiro, que lembrou que o Partido Socialista reclamou a comparecencia do ministro De Guindos e de Feijóo para explicar este asunto.
