Unión Leiteira Galega (Ulega) presentouse este venres como a primeira organización de produtores lácteos en Galicia e no Estado, á que se uniron un total de 2.254 gandeiros e que conta cunhas 500.000 toneladas de volume aproximado, co fin de 'negociar en pé de igualdade o prezo do leite'.
Deste modo, o secretario xeral de Unión Agrarias, Roberto García, mostrou en rolda de prensa o 'tremendo orgullo' do significativo número de gandeiros que depositaron a súa confianza na organización Ulega -impulsada por UU.AA.- 'nun momento de crise como o actual'.
Ao respecto, Roberto García remarcou, ademais, que existen máis de 800 solicitudes de gandeiros de cooperativas que están pendentes de formar parte de Ulega, a expensas da decisión do Ministerio de Agricultura para actualizar o regulamento de esixencias para entrar en organizacións de produtores.
Unha vez conseguido o número de produtores e volume mínimo para a constitución desta organización -que se marca en España en 1.000 gandeiros e 200.000 toneladas de leite de vaca- , os pasos a seguir a partir de agora é o da constitución de xuntas xerais territoriais e a elección da xunta directiva, que se prevé se faga nun prazo dun mes.
Esta organización de produtores lácteos busca negociar en nome dos seus membros para mellorar o equilibrio na cadea de valor, en pro de 'unir forzas' para establecer 'estruturas fortes e poderosas'.
Así mesmo, existe un acordo entre as organizacións sindicais e a Xunta para posteriormente constituír unha asociación de organizacións de produtores que se poidan crear no futuro en Galicia, ao tempo que Unión Leiteira Galega está aberta á colaboración con outras comunidades.
NEGOCIACIÓN 'DENDE XA'
Todo iso, á espera de que a partir do 3 de outubro deste ano entre en vigor o chamado 'paquete lácteo', polo que será obrigatorio asinar contratos por escrito e por adiantado, no que figure, entre outros, prezo, prazos ou volume a entregar.
Sobre esta cuestión, Roberto García denunciou a actual situación de prezos do leite galego 'por debaixo' do resto do Estado e da Unión Europea, o que xunto ao incremento aos prezos de produción 'obriga a que, dende xa' teñan que abrirse negociacións sobre os prezos do leite.
Así, referiuse ao 'SOS lanzado' ao presidente da Xunta, Alberto Núñez Feijóo, para reunirse con el e 'acabar con esta situación', de forma que se consiga 'unha transparencia' nos prezos, ao tempo que remarcou que 'o problema é que hai que traer leite de fóra porque non se dá abastecido' o mercado galego.
ESTATUTOS E REIVINDICACIÓNS
Nos estatutos de Unión Leiteira Galega facilitados aos medios establécese que o seu obxectivo é a concentración da oferta da produción dos socios que a integran e a comercialización co fin de optimizar custos produtivos, así como adecuar a produción á demanda.
Así mesmo, deixa claro que é unha organización 'non comercializadora', o que supón que negociará o prezo do leite sen transferencia da súa propiedade.
Nesta liña, Ulega realizou tres reivindicacións principais, en palabras de Roberto García, de forma que demandou como imprescindible que se prevexa na lexislación a figura dun 'árbitro ou mediador' no caso de discrepancias entre as partes; tamén pediu a creación dun fondo que sexa o 'Fogasa leiteiro', ao que poidan acudir os gandeiros no caso de padecer non pagamentos; e por último, reclamou que a futura lei de calidade agroalimentaria estableza que o prezo se forme dende o produtor ata o punto de venda e non que sexa a distribución quen marque o prezo.
UN TOTAL DE 12 ZONAS
Así, Roberto García remarcou que a Unión Leiteira Galega ten 'unha presenza importante' en todas as bisbarras, agrupadas en 12 zonas: Ourense, Arzúa, Bergantiños, Melide, Sarria; Lugo-Os Ancares-A Fonsagrada-Meira; Chantada-Terra de Lemos-A Ulloa-Quiroga; Soneira-Fisterra; Barcala-Xallas-Noia-Barbanza-O Sar; Terra Chá-A Mariña; Interior de A Coruña e Pontevedra.
A zona que máis produtores achega é Pontevedra con 473, mentres que a maior produción de leite provén do interior de A Coruña con 83 toneladas.
