O atuneiro 'Ratonero', sorprendido en mar aberto pola patrulleira do Servizo de Vixilancia Aduaneira 'Petrel' e que chegou o martes da pasada semana a Vigo, traía 2.560 quilos de cocaína, unha tonelada menos do anunciado, segundo fontes da investigación.
A droga pesouse onte definitivamente na central térmica de Endesa nas Pontes antes da súa incineración.
O SVA pesou unha parte dos 90 fardos, de 40 quilos, pero había outros con cantidades menores a 30 quilos, o que fixo crer que o alixo superaba amplamente as tres toneladas.
No atuneiro navegaban o patrón José Luis Devesa e dous veciños máis do Grove, José Francisco Fernández Suárez e Albino González Pérez, así como o uruguaio Álvaro Agustín Verdera Vieira e o colombiano Anyer Olguín Correa, que xa ingresaron en prisión.
Os fardos coa droga, segundo fontes da investigación, foron cargados nun punto da costa venezolana e a Garda Civil e o SVA decidiron abordar o atuneiro a unhas mil millas ao oeste das Illas Canarias, co apoio do buque 'Petrel' de Aduanas e dun avión da Garda Civil.
Precisamente o buque aduaneiro custodiou 'Ratonero', un barco de 21 metros de eslora, ata o peirao do Comercio de Vigo, no que se procedeu á descarga do alixo.
O buque e o seu armador, estaban sendo investigados ante a sospeita de que colaboraba con organizacións de narcotraficantes na subministración de combustible en mar aberto ás lanzadeiras, embarcacións rápidas que se utilizaban para achegar droga á costa.
Fst/cos/jl
