A asociación ecoloxista Adega advirte de que unha recente sentenza do Tribunal Superior de Xustiza de Galicia (TSXG) recoñece o impacto das macroplantas acuícolas incluso fóra da Rede Natura, como as que se prevén no Plan Acuícola da Xunta.
Así, segundo Adega a través dunha nota de prensa, o TSXG acaba de anular a instalación dunha piscifactoría en Laxe Brava, en Corrubedo, ao estimar o recurso presentado polo Concello de Ribeira.
Adega informa de que o Tribunal Superior argumenta que 'cabe dubidar' de que unha instalación de acuicultura, veciña ao Parque Natural de Corrubedo, que ocupa as dúas terceiras partes dun espazo de 308.000 metros cadrados, 'poida preservar todos eses valores (paisaxísticos e ambientais)'.
A asociación ecoloxista sinala que, desta maneira, queda anulada unha das instalacións máis polémicas do Plan Acuícola do Goberno bipartito, e o presidente da Xunta, Alberto Núñez Feijóo, debería 'pór as barbas a remollar' sobre o actual plan, que acaba de ser aprobado polo Goberno galego.
A xuízo de Adega, coa estimación deste recurso, o TSXG recoñece o impacto das macroplantas acuícolas incluso fóra da Rede Natura e chama a atención sobre a intensa e inxustificada ocupación do solo rústico.
Ademais, considera que senta precedente para que calquera cidadán, colectivo ou administración poida facer valer a protección do litoral fronte 'ao intento de asalto da patronal acuícola coa conivencia da Xunta'.
Neste sentido, Adega advirte de que dá igual que Feijóo declare a acuicultura de interese público para 'facerlle unha ponte á Rede Natura' ou que calquera sitio da costa poida ser ocupado porque 'non é posible agochar os enormes impactos ambientais destas instalacións'.
De feito, o TSXG di que 'se infrinxen os principios de cautela e de protección do medio ambiente que establece a Lei 9/2006', destaca Adega.
Por iso, pregúntase como quedará o actual Plan Director de Acuicultura que 'permite piscifactorías en parques naturais e aposta pola concentración das instalacións en macropolígonos' e cuestiona se este novo programa ten seguridade xurídica.
Adega critica este plan director por ser 'escandalosamente permisivo' xa que non prevé zonas de exclusión nas áreas de maior valor ambiental e tende a concentrar 'megaparques acuícolas' de centos de hectáreas en primeira liña de costa, o que considera que vai na dirección contraria á sentenza do TSXG.
Unha sentenza que afasta 'aínda máis' o obxectivo de Pescanova de ocupar cabo Touriñán, en Muxía, asegura Adega, que advirte de que non só protexe este espazo, senón calquera outro tramo de costa con valores paisaxísticos, biolóxicos ou xeomorfolóxicos, fronte aos 'instrumentos de demolición' que cre que deseñou a Xunta.
