Os letrados da súa defensa atópanse nun xuízo en Málaga. O líder dos socialistas galegos rexeitou declarar tras non poder contar cun avogado de oficio.
O secretario xeral do PSdeG, José Ramón Gómez Besteiro, acolleuse hoxe ao seu dereito a non declarar ante a xuíza Pilar de Lara ao non estar en Lugo os dous letrados que o asisten e ao non entender que se lle ofreza un avogado de oficio para este trámite.
Ante tal situación, no despacho da maxistrada que investiga o denominado caso Garañón permaneceu apenas cinco minutos esta mañá e posteriormente compareceu ante a prensa á que explicou que non comprende a razón pola que esta citación se mantivo para este martes a pesares da solicitude de que se cambiase o día pola circunstancia expresada.
O líder dos socialistas galegos, que confesou ser o máximo interesado en que non haxa dilacións, estaba citado pola suposta comisión de catro delitos -tráfico de influencias, prevaricación, suborno e contra a ordenación do territorio-, en relación todos eles coa urbanización da polémica finca de O Garañón na cidade amurallada.
Gómez Besteiro lembrou que se informou previamente e con tempo suficiente de que os seus avogados, aos que paga "cos seus aforros, polo tanto non me saen gratis", ían estar nesta xornada "na outra punta do Estado español", e pódese comprobar "con luz e taquígrafos" que se atopan na "provincia de Málaga", así que "non podían asistir".
Co plantexamento dun avogado de oficio que descoñece "esta suposta macro-causa" dunha vintena de tomos, proseguiu, o dereito á defensa "veríase moi condicionado", polo que "o que hoxe ocorreu (a súa actuación) responde a unha pura lóxica e a un puro sentido común. E non teño problema en vir outro día, cando estean os meus avogados", remarcou Gómez Besteiro.
A titular do Xulgado de Instrución número un de Lugo, Pilar de Lara, ditou recentemente un auto no que rexeitaba a petición formulada pola defensa do secretario xeral dos socialistas galegos, José Ramón Gómez Besteiro, para aprazar a súa declaración no caso Garañón, fixada para este día 12.
Segundo informou o Tribunal Superior de Xustiza de Galicia (TSXG), a xuíza entendeu, e así o expuxo en tal resolución, que esa petición de adiamento, coa desculpa de que os dous avogados que representan a Besteiro tiñan outra citación noutro xulgado, era unha "manobra fraudulenta" que perseguía como obxectivo "dilatar no tempo a declaración e o procedemento".
