A deputada por Pontevedra Carmen Gallego desiste de ir nas listas do PSdeG para as próximas eleccións de outono, mentres que o seu compañeiro por Lugo Vicente Docasar tamén avanzou que non repetirá na candidatura e volverá ao seu traballo como profesor, no medio de acusacións polo que cualifica de "caza de bruxas" nas filas socialistas.
Ambos apoiaron a José Luis Méndez Romeu nas primarias do partido nas que resultou vencedor Xoaquín Fernández Leiceaga. É máis, o anuncio de Gallego e Docasar prodúcese despois de que o pasado venres o propio José Luis Méndez Romeu confirmase que abandona a política activa, aínda que manterá a militancia no PSdeG.
Carmen Gallego afirma que no seu caso é unha decisión que adoptou "hai moito tempo e agora está convencida de que o seu partido "pagará" o "sectarismo" co que, ao seu xuízo, aborda o candidato, Xoaquín Fernández Leiceaga, a confección das candidaturas.
"Non repetir nas listas é unha decisión que tomei hai moito tempo, sabía que esta era a miña última lexislatura e téñoo todo preparado para retomar a miña actividade privada no ámbito da pesca", subliñou, en declaracións a Europa Press, a que fora conselleira de Pesca no Goberno bipartito que dirixía Emilio Pérez Touriño.
Gallego, quen puxo nas últimas semanas voz ao sector máis crítico coa actual xestora e o candidato do partido, recoñeceu que non repetirá nas listas, pero tamén admitiu que "non" comparte "a actual conxuntura e forma de facer as cousas" do PSdeG.
"Non comparto, por exemplo, que se traballe coa mensaxe de que imos ser segundos, nin tampouco comparto as formas", esgrimiu, ao tempo que discrepa de que Leiceaga apele de forma reiterada á necesidade de acometer "unha renovación". "Se renovar pasa por eliminar aos que non pensan como ti, non se chama renovar, chámase sectarismo", matizou.
Dito isto, reafirmouse en que no PSOE non só caben "tódolos que están", senón que sería preciso "ampliar" a súa base e "volver os ollos" cara á sociedade civil. Gallego, quen chegou ao Parlamento en 2001, tamén advertiu que as novas caras e os "referentes" non só non son "incompatibles", senón que ambos perfís son "necesarios".
"Se os que gañaron as primarias (de Leiceaga fronte ao coruñés José Luis Méndez Romeu --a quen Gallego, Docasar e outros membros do Grupo Parlamentario se significaron apoiando publicamente--) queren poñer á fronte do partido aos seus, pérdese a metade do partido", lamentou.
"NON DEIXO A POLÍTICA"
Preguntada acerca do papel que prevé xogar na próxima campaña electoral, Gallego aclarou que, aínda que non repita nas listas, ela "non" deixa a política, polo que seguirá traballando a favor do PSOE e contribuíndo a "dignificar" a política.
Para avanzar neste camiño e en pleno debate sobre as listas --as asembleas locais empezan formalmente a reunirse esta semana--, Gallego enviou varios consellos a Leiceaga: que se "lea" os estatutos do partido e recorde que o candidato "non decide" as listas, que trate de facer as candidaturas "cos mellores e non cos que mellor lle caen" e que "deixe de pensar tanto nos de dentro e pense máis nos de fóra".
"A sociedade necesita un referente alternativo ao PP e a (Alberto Núñez) Feijóo, as súas políticas de recorte fixéronlle moito dano á xente. O PSdeG debe falar coa sociedade civil e incorporala ao proxecto", sentenciou.
"CAZA DE BRUXAS"
Un discurso cunha carga crítica similar contra os actuais mandatarios do PSdeG é o que exhibe Vicente Docasar, quen volverá ao seu traballo como profesor no Instituto Daviña Rey de Monforte ao día seguinte de que Alberto Núñez Feijóo disolva o Parlamento para a convocatoria das autonómicas de outono.
Docasar di que se vai "moi decepcionado". "Un traballou coa maior honradez que pode, dedicándose en corpo e alma e despois hai cousas que non me gustan", esgrime e agrega que "parece que as primarias se organizan para darlle ao partido vida e democracia e logo, na práctica, convértense nunha caza de de bruxas, nunhas purgas enormes".
Ao respecto, relata que a "decepción" co PSdeG se orixina coa marcha de José Ramón Gómez Besteiro, que tivo que dimitir o pasado mes marzo ao ratificarse que contaba con dez imputacións. Deste exsecretario xeral do PSdeG recorda que o foi buscar ao instituto para entrar na súa executiva cando asumiu o cargo e apunta que a configuración de xestoras en Lugo e en Galicia "produce un funcionamento interno que non é o máis axeitado".
Vicente Docasar asegura que falou con compañeiros das provincias de Pontevedra, A Coruña, Lugo e Ourense e "ven como Leiceaga e as distintas xestoras do partido en Lugo e en Galicia o que fan é colocar aos seus amigos, á súa xente de confianza, desprazando a todos os que deron o seu apoio a Méndez Romeu". "Iso ao PSOE vaille facer dano", conclúe a xeito de alerta. |
| |
|
