Catro axentes resultaron feridos de diversa consideración ao intervir para evitar o suicidio dun varón
Catro axentes do Corpo Nacional de Policía da Comisaría de Vigo resultaron feridos de diversa consideración, ao intervir nun domicilio da cidade para evitar o suicidio dun varón, que os atacou cunhas tesoiras de grandes dimensións.
Segundo informaron fontes policiais, os feitos aconteceron na noite do xoves, cando unha muller chamou ao 091 dende a súa vivenda da rúa Zamora, para alertar de que o seu marido se encerrara no baño e ameazaba con suicidarse.
Ao lugar acudiron varias dotacións e unha ambulancia do 061, xa que o home ten antecedentes psiquiátricos e, segundo puido saber a Policía, era agresivo e "podería resultar extremadamente perigoso". Tras unha hora falando co señor, non conseguiron que depuxese a súa actitude, nin sequera coa mediación dun médico.
Por iso, nun momento en que o home deixou de falar e, temendo que puidese atentar contra a súa propia vida, os axentes decidíronse a entrar pola forza no baño.
Nese momento, o varón atacounos cunhas tesoiras de grandes dimensións, e tratou de cravarllas a un dos axentes no colo. No forcexo, todos os axentes resultaron con diversas feridas, a pesar de que levaban equipos de protección (luvas anticorte, chalecos e escudos): a un deles, o agresor atravesoulle unha man coas tesoiras, a outro mordeuno, e a todos lles causou diversos cortes, contusións e outras feridas máis leves.
DETIDO CON ANTECEDENTES
Finalmente, o home foi reducido polos axentes e sedado polos servizos médicos de urxencia, que tiveron que subministrarlle dúas doses de tranquilizantes.
Posteriormente, foi trasladado ao hospital Meixoeiro para a súa avaliación psiquiátrica, onde quedou ingresado baixo custodia policial. En canto os médicos o autoricen, comunicaráselle ao home (que ten dous antecedentes policiais por feitos violentos) que está detido polos supostos delitos de homicidio en grao de tentativa e lesións.
Mentres, os axentes que interviñeron neste operativo tiveron que ser atendidos das feridas nun centro médico e non precisaron ingreso hospitalario.