Un home residente no municipio lucense de Antas de Ulla foi detido como sospeitoso de intentar cazar xabarís ilegalmente, informaron hoxe fontes da Garda Civil.
Axentes do Seprona, un servizo da Garda Civil, que procedía a inspeccionar unha zona de monte no lugar de Fontelo, coñecida como As Cancelas, no termo municipal de Antas de Ulla, acharon un home colocando dous lazos, supostamente para cazar xabarís de forma ilegal, e puxérono a disposición xudicial.
Os axentes procedían a unha operación de investigación para comprobar a existencia de supostas cortas ilegais de árbores e accidentalmente comprobaron que a ambos os dous lados dunha baña de xabarís alguén colocara dous lazos dispostos para uso, polo que, despois de desmontalos, puxeron en marcha un dispositivo de vixilancia para identificar o cazador furtivo.
Ao día seguinte, ao amencer, os axentes situáronse nun punto desde o que podían divisar, sen ser vistos, o lugar no que estaban colocados os lazos e, despois de varias horas de vixilancia, observaron un home que os estaba preparando para o seu uso, coa intención evidente de capturar algún animal.
Inmediatamente, a patrulla do Seprona procedeu a arrestar o suposto furtivo, identificado coas iniciais J.F.P.,sobre o que pesan sospeitas de 'cazar con medios non selectivos' e 'sen autorización do titular do couto', indicaron as fontes.
O individuo foi posto a disposición do Xulgado de Instrución de Chantada, engadiron as citadas fontes.
