Dúas persoas, donos dun circo en cuxas instalacións faleceu un traballador esta madrugada en Arcade (Pontevedra) ao sufrir un accidente, foron detidas, informaron a EFE fontes da Garda Civil.
(Actualiza a GL3045, ao conter máis datos)Ao primeiro dos apresados, de nacionalidade portuguesa, élle imputado un suposto delito contra os dereitos dos traballadores, xa que o traballador falecido, de nacionalidade senegalesa, non tiña contrato.
Tamén se lle imputa un presunto delito de homicidio imprudente, xa que era el quen manexaba o motor eléctrico co que se move a estrutura do circo, co que morreu golpeado o traballador.
Ao segundo dos detidos, de Ourense, impútaselle un presunto delito contra os dereitos dos traballadores.
O traballador, que participaba esta madrugada en Arcade na montaxe de varias torres, morreu golpeado por unha delas a uns 12 metros de altura.
O suceso ocorreu pasadas as 03.45 horas no porto de Arcade, onde acudiron ademais efectivos da Garda Civil e das Urxencias Sanitarias.
Os bombeiros desprazaron ao lugar un vehículo-escada para rescatar o home, duns 35 anos, que morreu despois do golpe no alto da torre. Tamén rescataron outro home que traballaba na montaxe das torres mais que non sufriu feridas.
