O Consello Galego de Universidades aproba a revogación de catro másteres da Coruña, 11 de Santiago e 10 de Vigo
O número de non pagamentos de estudantes universitarios en Galicia, tanto a nivel de alumnos, coma de importe e de expedientes, diminuíu en cifras superiores ao 20 por cento nos dous últimos cursos, segundo os datos achegados polas tres universidades galegas á Consellería de Cultura e analizados este luns no Consello Galego de Universidades.
Así, segundo apuntou a Xunta, detéctase nos dous últimos cursos - -2012/2013 e 2013/2014-- un "retroceso xeneralizado" nos non pagamentos de matrícula posteriores á modificación das condicións de acceso a bolsa por parte do Ministerio de Educación.
En concreto, os datos da Universidade da Coruña apuntan a un descenso do 27,2 por cento no número de anulacións, desistimientos e suspensións entre o curso 2011/2012 e o 2013/2014, mentres que na Universidade de Santiago os alumnos nesta situación baixaron un 20,6 por cento. A Universidade de Vigo, pola súa banda, rexistra entre estes dous cursos unha diminución do importe debido polos estudantes dun 38 por cento.
Aínda que para a consellería se constata o "retroceso" de persoas neste caso, Cultura reclamou as universidades que establezan un "sistema homoxéneo de rexistros" de non pagamentos, dada a "heteroxeneidade de datos recibidos" co obxectivo de poder analizar de forma conxunta os datos.
Ao mesmo tempo, a consellería reclamou a elaboración dun informe anual para presentar no consello Galego de Universidades co fin de seguir a evolución deste problema.
O conselleiro de Cultura, Jesús Vázquez, recordou durante o pleno do consello de Universidades a vontade do departamento que dirixe de coordinar as accións de todos os axentes do Sistema Universitario de Galicia no ámbito da política de bolsas e axudas destinadas a estudantes.
Nestes momentos, apuntou, estanse a recoller os datos das distintas institucións universitarias para convocalas posteriormente a unha reunión co obxectivo de analizar e poñer en común medidas que "racionalicen as liñas existentes".
PREZOS PÚBLICOS
O Pleno do consello de Universidades votou este luns afirmativamente por unanimidade a proposta de prezos públicos correspondentes aos estudios para a obtención de títulos de grao, máster e doutorado no Sistema Universitario de Galicia. En virtude deste acordo, mantéñense conxeladas tanto as primeiras como as sucesivas matrículas.
Jesús Vázquez indicou que esta decisión se basea no "convencemento" de que "debe apoiarse aos estudantes universitarios de Galicia" nestes "momentos de crise", asegurando "a igualdade de oportunidades". "Pretendemos minimizar o impacto da crise nas economías domésticas e asegurar, no posible, que as dificultades económicas non impidan o acceso ou a continuación da formación universitaria", sentenciou.
A conxelación de prezos, así mesmo, reforzarase coa convocatoria de bolsas complementarias ás do Ministerio de Educación para o pagamento da matrícula do alumnado de novo ingreso e de continuidade, posibilitando o apoio económico naqueles casos nos que, cumprindo os criterios económicos establecidos na convocatoria do Goberno central, non se poida acceder ás axudas polo incremento das esixencias académicas.
TITULACIÓNS OFICIAIS
O pleno informou tamén favorablemente a implantación de titulacións oficiais para o curso 2014-2015 no Sistema Universitario de Galicia, condicionada ao informe final da Axencia para a Calidade do Sistema Universitario, que deberá ser emitido antes do 31 de xullo para que poidan ser impartidas.
De ser así, a Universidade da Coruña sumará á súa oferta os títulos de Master Universitario en Enxeñaría de Camiños; en Enxeñaría Náutica e Transporte Marítimo; en Dirección, Xestión e Innovación de Institucións Escolares e Socioeducativas; e en Psicopedagoxía.
No caso da Universidade de Santiago, foron autorizadas as titulacións de grao en Enxeñaría Agrícola e Agroalimentaria; de Master Universitario en Biotecnoloxía, en Física, en Química, en Arqueoloxía e en Ciencias da Visión; e de doutorado en Estudios Culturais, Memoria, Identidade, Territorio e Linguaxe; en Ciencias Agrícolas e Ambientais; en Desenvolvemento Psicolóxico, Aprendizaxe e Saúde; e en Ciencias da Visión.
Pola súa banda, a Universidade de Vigo ten autorizados os títulos de Grao en Ciencias da Linguaxe, e de Master Universitario en Enxeñaría de Minas, Enxeñaría de Organización; Enxeñaría de Telecomunicación, Enxeñaría Industrial, Recursos Naturais e Tecnoloxía Agroalimentaria e Valoración, Xestión e Protección do Patrimonio. Ademais, están autorizados os doutorados en Análise Económica e Estratexia Empresarial e de Protección do Patrimonio Cultural.
No caso do Grao en Física para as novas Tecnoloxías, acordouse por unanimidade aprazar a autorización de implantación ata que a Axencia emita a súa informe final, dadas as características particulares desta titulación, así como a "confusión existente" ao seu arredor.
O pleno do conselo deu conta da proposta de prazas de novo ingreso que se someterá a aprobación nas próximas semanas no Ministerio, entre as que destacan as 350 prazas aprobadas para a Coordinación da Docencia Clínica en Galicia e para o Grao en Medicina; así como as 803 prazas dispoñibles para a realización do Master Universitario en Formación do Profesorado na Comunidade.
REVOGACIÓN DE TÍTULOS
No que respecta á revogación de títulos universitarios oficiais de master no Sistema Universitario de Galicia, o conselo informou favorablemente catro correspondentes á Universidade de A Coruña, 11 da Universidade de Santiago e 10 da Universidade de Vigo.
En concreto, na Universidade da Coruña revógase o Master Universitario en Procuradoría; o Master en Enxeñaría Marítima; o Master en Láser e Aplicacións en Química e o Máster en Tecnoloxías da Información e Comunicación en Redes Móbiles
No caso da USC, revóganse os másteres en Ciencia e Tecnoloxía de Coloides e Interfaces; en Dereito privado; en Enxeñaría para o Desenvolvemento Rural; en Industria e Economía Láctea; en Investigación Agraria e Forestal; en Investigación Básica e Aplicada en Ciencias Veterinarias; en Ciencias da Visión; en Investigación en Didáctica das Ciencias Experimentais e da Matemática; en Investigación en Psicoloxía Clínica e Psicobiología; en Procuradoría e en Psicogerontología.
Finalmente, a Universidade de Vigo verá suprimidos os seus másteres en Administración Integrada de Empresas; Biodiversidade e Ecosistemas; Ciencia e Tecnoloxía de Coloides e Interfaces; Dereito Urbanístico e do Medio; Ecosistemas Terrestres; Bioloxía Molecular, computacional e Ambiental; Investigación en Contabilidade e Finanzas; Metodoloxía e Aplicacións en Bioloxía Molecular; Procuradoría e Radiocomunicación e Enxeñaría Electromagnética.
