A GNR detivo o condutor, que estaba escondido, por condución temeraria e baixo os efectos do alcohol
A Garda Civil e a GNR portuguesa detiveron un condutor que fuxira dun control de tráfico nas inmediacións de Vigo, e que foi interceptado na localidade lusa de Ponte da Lima.
Os feitos aconteceron durante a realización dun control preventivo, cando unha dotación da Garda Civil de Tráfico deu o alto a un Audi A3 gris, con matrícula portuguesa, nas inmediacións da cidade olívica. O condutor, que ía acompañado por outros dous mozos, desobedeceu as ordes dos axentes e emprendeu a fuxida a gran velocidade, cara a A-55, en dirección a Portugal.
A Garda Civil puxo os feitos en coñecemento do Centro de Cooperación Policial e Aduaneira de Tui-Valença do Minho (CCPA), e efectivos da Policía portuguesa, xunto con axentes da Benemérita que perseguían condutor fuxido, lograron interceptalo en Ponte da Lima, a uns 40 quilómetros da fronteira con Galicia.
A GNR detivo o condutor, que estaba escondido, por condución temeraria e baixo os efectos do alcohol, mentres que a Garda Civil incoou dilixencias polos supostos delitos cometidos en territorio español.
