A Policía Autonómica imputa a este veciño por provocar un lume con restos forestais na parroquia de San Pedro de Muro durante o pasado 20 de outubro.
Axentes da Policía Autonómica imputaron a un veciño da localidade coruñesa de Porto do Son por un incendio forestal nese municipio no que quedaron calcinados 11.400 metros cadrados.
O lume que se lle imputa orixinouse o pasado xoves, 20 de outubro, no lugar de Rial, na parroquia de San Pedro de Muro, e produciuse como consecuencia da realización de varias queimas de restos forestais.
Segundo informa a Xunta, non tiña a preceptiva comunicación á Consellería de Medio Rural e tampouco se adoptaran as medidas regulamentarias preceptivas de seguridade para a súa realización.
Para a investigación e extinción do lume contouse coa colaboración da Brigada de Investigación de Incendios Forestais (BIIF) do Distrito Forestal IV, do Barbanza, da Consellería de Medio Rural.
Polos feitos tramitáronse as dilixencias correspondentes, que foron remitidas ao Xulgado de Instrución en funcións de garda de Noia. En vaino de ano, a Policía Autonómica imputou xa a 67 persoas por delitos relacionados cos incendios forestais.
