O sindicato LAB reclamou hoxe que se investigue a morte do mariñeiro falecido onte no porto de Pasaia (Gipúscoa), así como que 'se analicen as causas inmediatas e básicas que desencadearon o accidente e que se depuren responsabilidades arredor deste'.
O cadáver dun tripulante do barco de pesca galego 'Farillón' foi localizado por unha embarcación onte pola mañá, flotando xunto a un peirao do distrito pasaitarra de Trintxerpe
Nun comunicado LAB mostra o seu 'apoio e solidariedade' aos familiares e achegados do falecido, ao tempo que lembra que 'detrás de todos os accidentes laborais se encontran as condicións de traballo e vida da clase traballadora'.
A central sindical explica que, segundo parece, o accidente no que morreu o mariñeiro se produciu 'supostamente' á 'hora de embarcar' e critica que a autoridade laboral, o Instituto Vasco de Seguridade e Saúde Laborais, Osalan, e a Inspección de Traballo non poñan 'ningunha medida' para 'paliar' os riscos de caída nos accesos aos barcos.
Lembra neste sentido que varios estudos puxeron 'de manifesto' que nalgúns casos 'non existen pasarelas de acceso aos barcos, e que cando as hai, ou non se usan ou son deficientes', o que 'supón un alto risco de caída ao mar'.
'Da mesma maneira, temos que incidir nas condicións especiais e duras que se dan no sector e o alto nivel de precariedade existente neste', prosegue LAB, antes de denunciar que o falecido no porto de Pasaia 'levaba unha semana no barco e facía substitucións', o que reflicte como a 'precariedade' e a 'temporalidade' son 'causas de accidentes de traballo'.
