En Galicia instalaranse 3.618 mesas electorais distribuídas polas catro provincias.
Máis de 2,7 millóns de galegos están chamados a votar nas eleccións ao Parlamento Europeo do próximo 25 de maio, segundo os datos que publica este xoves o Instituto Nacional de Estatística (INE).
En concreto, están chamados a votar 2.281.555 cidadáns residentes en Galicia, 421.719 residentes no estranxeiro e 7.851 doutros países da Unión Europea (UE) residentes en Galicia, o que dá unha suma total de 2.711.125 persoas.
En canto ás mesas electorais, na Comunidade galega instalaranse 3.618, distribuídas polas catro provincias: A Coruña (1.427), Pontevedra (1.137), Lugo (536) e Ourense (518).
Así, por provincias, 1.090.010 dos electores correspóndense con A Coruña, 901.908 con Pontevedra, 367.530 con Ourense e 351.677 con Lugo. O censo electoral poderase consultar do 7 ao 14 de abril, segundo precisa o INE.
En canto aos electores de A Coruña, 942.565 son españois residentes en Galicia, 145.745 residentes no estranxeiro e 1.700 cidadáns da Unión Europea que residen en Galicia. Pontevedra ten 777.057 electores españois residentes en Galicia, 121.772 no estranxeiro e 3.079 procedentes da UE.
Pola súa banda, a maior parte dos electores de Lugo (290.463) son españois que residen en Galicia e o resto o fan no estranxeiro (60.281) ou son cidadáns da UE (933). No que a Ourense respecta, 271.470 son españois que residen na comunidade, 93.921 que residen no estranxeiro e 2.139 da UE.
DATOS ESTATAIS
Para o conxunto estatal, un total de 36.546.270 electores poderán votar nas eleccións ao Parlamento Europeo do 25 de maio de 2014, dos que 34.485.294 son españois residentes no Estado español, 1.724.390 no estranxeiro, e outros 336.586 son nacionais de países da Unión Europea que residen en España e manifestaron a súa vontade de votar no noso país.
O INE deu a coñecer este xoves, dous días despois da publicación do decreto de convocatoria dos comicios do 25 de maio, o censo electoral para esa cita coas urnas.
Nas últimas eleccións de ámbito estatal, as xerais de novembro de 2011, o censo foi inferior en case un millón de persoas, concretamente 35,77 millóns de persoas (todos españois porque os estranxeiros, aínda que sexan da UE, non poden votar neses comicios).
Se agora os españois residentes no estranxeiro son 1.724.390 persoas, nas xerais de 2011 os inscritos no CERA foron 1.479.314, o que supón que en dous anos a cifra de emigrados subiu en 245.076 persoas.
INGLESES E ROMANESES, OS PRINCIPAIS VOTANTES ESTRANXEIROS
En canto aos 336.586 cidadáns estranxeiros da Unión Europea que manifestaron a súa intención de votar no noso país, a maioría son do Reino Unido (82.552), seguidos dos romaneses (76.339), italianos (35.760) e alemáns (35.529),
Este censo electoral poderase consultar do 7 ao 14 de abril nos concellos e nas delegacións provinciais da oficina do censo electoral. Tamén nesas datas os españois residentes no estranxeiro e inscritos no CERA poderán comprobar os seus datos de inscrición nos respectivos consulados.
Se se observa algún erro ou omisión nos datos contidos no censo electoral, pódense presentar reclamacións do 7 ao 14 de abril, nos concellos, consulados ou nas delegacións provinciais da Oficina do Censo Electoral.
A partir do 28 de abril, unha vez que xa estean presentadas as candidaturas, a Oficina do Censo Electoral remitirá a cada elector residente en España unha tarxeta censal na que se indica a mesa en que lle corresponde votar, así como o local electoral e a súa dirección.
MÁIS INFORMACIÓN NO INE
Ademais, nas páxinas web da Oficina do Censo Electoral do Instituto Nacional de Estatística, http://www.ine.es está dispoñible información sobre o censo electoral, con datos sobre prazos, normativa legal, reclamacións, voto por correo e recontos de inscritos, mesas e locais electorais.
Igualmente, na Sede electrónica do Instituto Nacional de Estatística (INE), https://sede.ine.gob.es, pódense consultar as mesas e as direccións postais dos locais electorais por municipio, por múltiples criterios de busca. E os que posúan un certificado electrónico poden obter os datos da súa inscrición no censo electoral e os da mesa e o local electoral onde lles corresponde votar.
Pola súa banda, os electores que solicitaran o voto por correo poden consultar o estado da súa tramitación, sen necesidade de dispoñer do certificado electrónico.
