O PP denuncia a súa exclusión da rolda de negociacións e acusa o alcalde de "sectarismo"
A Marea Atlántica convocou os grupos municipais do PSOE e o BNG a senllas reunións a partir deste mércores "para debater o modificativo de crédito necesario para facer fronte ás facturas pendentes do concello, derivadas da xestión do PP de Carlos Negreira".
Nun comunicado, o grupo de goberno precisa que solicitarán a ambas as dúas formacións "retomar tan rápido como sexa posible as conversacións sobre o modificativo", despois de que a partida de 4,5 millóns de euros formulada polo grupo de goberno fose rexeitada en pleno cos votos en contra de PP e BNG e a abstención do PSOE.
Neste escenario, a oposición acusou a Marea de ausencia de diálogo antes de levar este asunto a pleno, ademais de cuestionar a redución de partidas en áreas como emprego.
Agora, o goberno local argumenta que "do mesmo xeito que xa se fixo a semana pasada", solicita aos partidos "que faciliten por escrito as súas propostas detalladas sobre altas e baixas no modificativo de crédito, tomando como punto de partida o documento rexeitado en pleno".
"SECTARISMO", SEGUNDO O PP
Mentres, o Grupo Municipal do PP acusou o alcalde, Xulio Ferreiro, de "sectarismo" ao "excluír" ao PP da rolda de negociacións, "o que sorprende por canto ningún grupo salvo o de goberno votou a favor dunha modificación presupostaria que incluía máis de dous millóns de euros de recortes en gasto social".
Ao respecto, a edil popular Rosa Galego argumenta que "estas reunións excluíntes xa tiveron lugar na negociación do acordo de organización dos grupos municipais, posto que a Marea convocou só a socialistas e nacionalistas para negociar un acordo que afectaba a toda a corporación".
OPERACIÓN DE TESOURARÍA
Por outra banda, o PP volve acusar de "innecesaria" a operación de tesouraría que aprobou a Xunta de Goberno extraordinaria o pasado venres. Así, argumenta que o empréstito "se basea nun informe de tesouraría de hai un mes e que recolle que aínda que se amortice este ano quedaría un saldo líquido de nove millóns de euros".
Tamén insta o alcalde a que "convoque canto antes o consello de Emalcsa, porque permitirá dispoñer de 5,5 millóns de xeito inmediato".
