O concurso literario ten como finalidade animar á escrita de pezas teatrais dirixidas ao público mozo
A Editorial Galaxia e o IES Ribeira do Louro a través do seu Equipo de Dinamización Lingüística, convocan o I Certame de textos teatrais Roberto Vidal Bolaño.
Homenaxeando o nome do xenial dramaturgo compostelán a quen se lle adicou o Día das Letras Galegas do pasado 2013, este novo premio ten como finalidade animar á escrita de pezas teatrais dirixidas ao público mozo, é dicir, ao alumnado da ESO e Bacharelato.
Poderán participar no certame todas as persoas que o desexen, de calquera nacionalidade, con textos teatrais inéditos e non premiados noutros certames, que estean escritos en lingua galega.
As obras serán de temática e extensión libre e deberán prestar especial atención á innovación dramatúrxica, as novas linguaxes contemporáneas e a singularidade temática das pezas, tendo en conta o publico ao que van dirixidas.
O premio consistirá na publicación da obra por parte da Editorial Galaxia.
O prazo para a recepción de orixinais estará aberto ata o 1 de abril de 2018 e o fallo darase a coñecer no mes de xuño.