A área cirúrxica do hospital recibiu un presuposto próximo aos cinco millóns de euros para inverter en tecnoloxía que equipe os dous quirófanos integrados do centro
O novo hospital de Vigo Álvaro Cunqueiro (HAC) conta coa primeira cámara cirúrxica con tecnoloxía 3 D instalada en España, que permite a visualización en tres dimensións en varios monitores e transmite a información por videoconferencia.
Segundo informou a Xunta nun comunicado, a área cirúrxica do hospital recibiu un presuposto próximo aos cinco millóns de euros para inverter en tecnoloxía que equipe os dous quirófanos integrados do centro, isto é, espazos de traballo con tecnoloxías da imaxe e transmisión de datos.
Así as cousas, o HAC tamén incorpora nas súas instalacións a "primeira lámpada en Europa" dotada de intelixencia artificial, que mantén as condicións de traballo permanentemente mediante axuste autónomo.
En total, coa suma dos dous quirófanos integrados, o novo hospital situará 24 quirófanos, dous deles destinados a Urxencias, 20 a cirurxía programada e outras dúas salas cirúrxicas exclusivas para Obstetricia. As instalacións complétanse co bloque de cirurxía do Hospital Meixoeiro, que ten 12 quirófanos e unha área de técnicas especiais con tres salas de cirurxía menor.
Segundo explicou a directora de Procesos asistenciais, Mar Vélez, todas estas salas do Chuvi, que conforman un total de 5.500 metros cadrados en superficie espacial, atenderán unha actividade cirúrxica "superior ás 40.000 intervencións anuais".
