O candidato socialista á Presidencia da Xunta, Pachi Vázquez, afondou na enquisa do CIS dada a coñecer este mesmo venres para remarcar que 'a maioría dos galegos queren un cambio de goberno', malia que o aspirante á reelección, Alberto Núñez Feijóo, estea 'encantado consigo mesmo'.
Ante unhas 200 persoas que non encheron o auditorio municipal de Cerceda (A Coruña), situado en fronte da vila deportiva 'Fernando González Laxe - o primeiro presidente da Xunta do PSOE-, e tamén ante outros 200 veciños da localidade lucense de Vilalba, o socialista detallou que, aínda que prognostica unha maioría absoluta do PP, está 'moi justita'.
Atribuíu estes datos a que, aínda que Feijóo 'percorre os estudos de gravación de Madrid dicindo que Galicia está magnífica, a realidade sempre se impón'.
E é que 'o principal problema' da comunidade é 'o paro' e, como dixo, 'crece o dobre' que a media estatal malia que o presidente 'conseguiu bater a marca histórica do paro'.
Xunto con iso, o cabeza de cartel do PSOE nas eleccións galegas denunciou que a débeda autonómica se elevou a 7.300 millóns de euros en'tres anos e medio' a pesar de que 'en 32 anos' non subira dos 3.200 millóns de euros.
'O que se di o mellor contable, de contas tampouco pode presumir', atacou a Feijóo. Así as cousas, sen ter 'as contas saneadas' aínda deixando 'facturas no caixón', ironizou con que 'o que vai ben é Feijóo, non Galicia'. 'O seu cartel xa o pon: Primeiro Feijóo', chanceou, utilizando o lema de campaña do PPdeG 'Feijóo. Primeiro Galicia'.
'NON TEN POR QUE ESTAR ASÍ'
Tras facer fincapé en que 'Galicia está mal, pero non ten por que estar así', asegurou que non lle tremerá 'a man' para 'facer unha Galicia distinta', na que 'non se cobre aos maiores polos seus medicamentos, os enfermos de diálise non teñan que pagar polas ambulancias e se fagan mamografías'.
'Empeñáronse en que as vítimas paguen a crise, cando o hai que cobrar a quen nos meteu nela', criticou, recordando a súa promesa de incrementar a fiscalidade ás rendas máis altas e a banca para centrarse na creación de emprego tamén co aforro procedente do gasto improdutivo da administración.
Dentro deste apartado, recuperou a necesidade de 'reducir deputacións' en lugar de 'recortar de onde non hai'. 'Hai que ser capaces de sacalas, porque xa non valen, fai falta un organismo distinto', incidiu, partidario de utilizar a máxima 'unha administración, un servizo'.
Ademais, aproveitando a súa presenza en Vilalba, o socialista prometeu tamén 'inspeccións de consumo e competencia' nas grandes áreas comerciais para evitar que 'tiren o prezo do leite'.
Así mesmo, garantiu que, nos 100 primeiros días, establecerá que as empresas con débedas cos gandeiros 'non recibirán un euro' da Xunta, e un plan de mobilidade de terras para 'ordenar o territorio' e facer unha gandaría 'competitiva'.
XOGAMOS A VIDA
Finalmente, formulou que nestes comicios 'non se xoga a vida nin o PP nin o PSOE', senón que está en xogo 'a vida das persoas', en tanto que se decidirá xestionar da crise 'igual que Portugal e Grecia' ou por 'un camiño lento e difícil' que permita 'transformar unha economía especulativa' en produtiva'.
Pola súa banda, prometeu Pachi Vázquez que non contará 'unha mentira' nesta campaña, xa que xulgou que é 'peor' que tras sete meses gobernando 'te insulten pola rúa' que 'perder' uns comicios. 'Iso é o que pasa a Rajoy e lle empeza a pasar a Feijóo', finalizou.
Unha das anécdotas do primeiro día de campaña foi o cariñoso saúdo que o líder socialista dedicou ao alcalde de Lugo, Xosé López Orozco, imputado por unha denuncia dun axente da Policía Local. 'Un abrazo moi grande ao amigo Orozco', lanzou.
