Con esta suba interanual xa son tres consecutivas as que encadea este indicador na comunidade galega
O índice xeral de produción industrial (IPI) aumentou un 10,5% en xullo en Galicia en comparación co mesmo mes de 2014, o que representa o cuarto maior incremento por comunidades autónomas, segundo os datos que publica este xoves o Instituto Nacional de Estatística (INE).
Ademais, con esta suba interanual, xa son tres consecutivas as que encadea este indicador na comunidade galega, tras o repunte rexistrado en maio, do 3,6%, e o aumento do 14,1% de xuño. Deste modo, acumula unha evolución do 3,7% no que vai de ano (en abril baixou un 1,5%).
No conxunto estatal, o IPI aumentou un 5,8% o pasado mes de xullo en relación ao mesmo mes do pasado ano, 1,6 puntos inferior á experimentada en xuño (+7,4%).
Tras moderar o seu avance interanual, co aumento de xullo a produción industrial logra encadear seis meses de incrementos interanuais consecutivos, despois de lograr en xuño a taxa máis alta dende marzo de 2014, cando creceu un 8,1%.
Ademais, se se eliminan os efectos estacionais e de calendario, a produción industrial creceu un 5,2% respecto a xullo de 2014, taxa 0,7 puntos superior á rexistrada en xuño.
A evolución da produción industrial en xullo foi consecuencia do crecemento experimentado polos bens de equipo (+10,9%), enerxía (+9,2%), bens intermedios (+3,9%) e bens de consumo (+1,8%).
En taxa mensual (xullo sobre xuño), a produción industrial, corrixidos os efectos estacionais e de calendario, subiu un 0,6%, taxa 0,2 puntos superior á observada en xuño.
O único sector que experimentou durante o mes de xuño unha taxa negativa en termos mensuais foi o dos bens de consumo duradeiro, que rexistrou un retroceso do 0,7%.
Dentro das ramas de actividade, a que obtivo unha maior progresión foi a da industria do tabaco, do 14,2%, fronte ao incremento do 7,2% nas artes gráficas e do 5,6% na fabricación de bebidas.
Pola contra, as ramas de actividade con maiores retrocesos foron as de extracción de hulla, antracita e lignito, cunha baixada do 8,8%, así como a de fabricación de produtos informáticos, electrónicos e ópticos, o descenso da cal foi do 6,1%.
BALEARES, ASTURIAS E EXTREMADURA
Por comunidades autónomas, a taxa anual de produción anual aumentou en todas, se ben os maiores incrementos se experimentaron en Baleares, do 13,7%, e en Asturias, do 12%. En Extremadura a progresión foi do 10,9%, en Galicia do mencionado 10,5% e en País Vasco do 10%.
Madrid e Cataluña, con taxas do 5,5% e do 3%, respectivamente, rexistraron avances inferiores á media nacional do 5,8%, ao tempo que Navarra, cun 0,6%, experimentou o menor incremento.
