O conselleiro de Cultura e Turismo, Roberto Varela, presentou hoxe no mosteiro de San Martiño Pinario de Santiago a mostra 'Xacobeo, 20 anos de Camiño', cuxo obxectivo, segundo dixo, 'é facer visibles 20 anos de traballo na recuperación histórica do Camiño como eixe cultural e referente europeo'.
A exposición conmemora o XX aniversario da SA Xestión do Plan Xacobeo e fai un percorrido expositivo polos fitos máis destacados destas dúas décadas de historia.
Segundo Varela, a mostra repasa os logros do Xacobeo 'en cada un dos seus piares fundamentais', que enumerou en 4 liñas de actuación: a promoción nacional e internacional, o fomento da produción e consumo de cultura, a restauración e posta en valor dos camiños, e a atención ao peregrino a través da rede de albergues.
O titular de Cultura e Turismo aludiu á promoción do Camiño e de Galicia 'fóra das nosas fronteiras', o que, dixo, fixo posible 'que o número de peregrinos que nos visitan se multiplique por 38 en tan só dúas décadas'.
'Grazas ao impulso do Xacobeo, o Camiño de Santiago converteuse nun fenómeno universal e na mellor carta de presentación da nosa terra ante o mundo', asegurou.
A exposición hoxe inaugurada é un resumo que integra todos os aspectos relacionados co coidado e promoción dos camiños de Santiago nos que a SA de Xestión do Plan Xacobeo, empresa pública dependente da Xunta, vén traballando desde a súa creación en 1991, con motivo da celebración do Ano Santo 1993.