Como cada ano, a localidade pontevedresa de Sabucedo prepárase para acoller A Rapa das Bestas, do 7 ao 10 de xullo, unha festa de Interese Turístico Internacional que este ano virará entrono á “agresión eólica que está planificada nos montes onde viven as bestas de A Rapa”. O presidente da Asociación de A Rapa das Bestas, Paulo Vicente Monteagudo, estima unhas cifras de visitantes “como os outros anos”, entre os 10.000 e 15.000.
Un exemplo desa cantidade de visitantes que recibe a festa móstrase nos datos de ocupación hostaleira que o presidente da Asociación situou en “todo cheo”. Así, para todos aqueles que non coñezan este festexo explica que se basea, en palabras de Vicente, “na pervivencia dos animais nos montes, no ben das bestas”.
“Facemos o que temos que facer que é baixar ás bestas do monte, desparasitarlas e rapalas, que é realmente no que consiste a festa”, detalla o presidente da Asociación. Desta forma, as bestas serán recollidas o sábado en O Castelo ás 11,00 horas e entrarán en Sabucedo ás 14,00 horas desa mesma xornada. En total haberá tres curros, o primeiro o sábado ás 19,00 horas, o segundo o domingo ás 12,00 horas e o terceiro o luns ás 12,00 horas.
Aloitadores
Como cada ano, os aloitadores serán os encargados desa rapa, pero hai que cumprir uns requisitos para poder pertencer a este grupo e é que os veciños de Sabucedo serán os que loiten, así como aquela xente que ao longo do ano “está aí para cando teña que botar unha man”. Ademais, cada ano galardóase un loitador en A Rapa e Vicente avanza que xa teñen ao agraciado desta edición, pero “haberá que esperar até ese día” para desvelalo.
En canto ao tema sobre o que xirará o festexo este ano, explicou que realizarán unha serie de pancartas, e tamçen se tratará nas intervencións que se fagan por parte da Asociación, e ademais nos concertos animarán aos artistas para “que falen da problemática”. O presidente da Asociación explica que “durante todo este tempo” fixeron alegacións contra o proxecto e avanza que “van ir á xustiza” contra os parques eólicos que queren pór na zona por onde baixan estes cabalos. “Estamos nunha loita desde hai varios anos, imos tirar para diante”, advirte Monteagudo.
Catro proxectos
En liña con isto, hai uns meses, con motivo do as palabras de Rodrigo Sorogoyen, galardoado co Premio Goya á Mellor dirección pola súa película As bestas, publicaron na páxina web da Asociación unha alegación que recolle as palabras do director, “enerxía eólica si, pero non así”. Desta forma, o escrito fai referencia ao catro proxectos eólicos que se planificaron no territorio onde habitan as mandas salvaxes de Sabucedo.
A Asociación remarca que eses montes “son un rico patrimonio arqueolóxico e sobre todo natural” e lamentan que con eses proxectos o territorio “quedaría fragmentado pola construción de grandes vías” para permitir o acceso ao transporte co equipamento necesario para a construción dos parques.
“Non queremos subir ao monte e tropezarnos con monstros de 200 metros de altura que invaden todo o territorio co seu incesante ruído”, remarcan no escrito.
