Sanidade asegura que se cumpren os servizos mínimos e garante 'en todo momento a calidade da asistencia'
O Servizo Galego de Saúde (Sergas) destaca o 'normal funcionamento' dos servizos sanitarios na quenda de noite e de mañá no marco da xornada de folga convocada polos sindicatos na sanidade pública galega e resaltou o cumprimento dos servizos mínimos. Pola súa banda, os convocantes denuncian 'pequenas incidencias' nalgún centro.
En declaracións a Europa Press, a directora xeral de Recursos Humanos do Sergas, Margarida Prado Vaamonde, subliñou o 'cumprimento total' dos servizos mínimos fixados pola Consellería, que os sindicatos consideran 'bastante elevados', e precisou que non ten constancia de incidencias.
Sobre a participación, concretou que dos aproximadamente 20.800 profesionais que deberían traballar esta xornada no Sergas, descontando os servizos mínimos decretados, '3.100 profesionais' se sumaron ao paro, o que supón o 21,85 por cento, segundo puntualizou Prado.
Neste sentido, a responsable de Recursos Humanos do Sergas insistiu en que 'se están a cumprir os servizos mínimos' e 'garante en todo momento a calidade da asistencia', para que os pacientes 'non sufran'.
Por iso, Margarida Prado reiterou a mensaxe de 'tranquilidade' aos pacientes porque 'os profesionais están atendido dentro dos servizos mínimos'.
INCIDENCIAS
En xeral, os sindicatos destacaron a ausencia de incidentes na primeira das dúas xornadas consecutivas de folga convocadas na sanidade pública galega e unicamente sinalaron 'pequenas incidencias'.
Ao respecto, en declaracións aos medios no Hospital Clínico, o representante sindical da CIG Xosé Manuel Marcote comentou que a xornada de paro 'se está a desenvolver ben' e 'os traballadores están a responder á folga, a non ser algunhas pequenas incidencias'.
Deste modo, indicou que 'a Administración chamou a dous traballadores que tiñan que facer unha consulta ordinaria, cando viña no DOG que só estaba para urxencias e preferentes' e auxiliares de farmacia que non van á folga leváronas ao Clínico porque as deste centro 'foron á folga'. 'Salvo esas incidencias os traballadores respondendo bastante ben', apostilou.
Preguntada sobre a denuncia das organizacións sindicais de desprazamento de profesionais dun hospital a outro, a directora xeral de Recursos Humanos do Sergas manifestou que recibiu a comunicación e procederon a comprobar 'todo o que sexa necesario' coa Xerencia, aínda que avanzou que non cree que suceda iso.
Os representantes sindicais recorda que a convocatoria desta folga 'é para preservar a calidade asistencial' e rexeitar aspectos como as 'limitacións' no seu labor diario -á hora de receitar, de pedir exploracións e outras- co fin de 'intentar preservar' o sistema público sanitario.
No marco da convocatoria deste luns, en centros como o Hospital Universitario Lucus Augusti de Lugo (HULA) realizouse unha concentración no hall, onde sobre unhas 300 persoas protestaron contra os recortes e para 'que non se faga negocio coa saúde'.
