O temporal con mar de fondo que azouta a costa galega demostrou a 'solidez e resistencia' do dique do porto exterior da Coruña que, xa terminado con todas as súas proteccións, se comportou como estaba previsto no proxecto técnico da estrutura e resistiu ondas de case 12 metros.
Fontes da Autoridade Portuaria destacaron hoxe que durante o episodio adverso desta semana, as ondas máis altas se rexistraron na madrugada de hoxe xoves, entre as 06:00 e as 08:00 horas, con máximas de 11,82 metros.
O dique de Punta Langosteira mide 3360 metros en tres aliñacións, con 25 metros de altura sobre o nivel do mar, e está protexido por máis de 160 000 bloques de formigón de diferentes tamaños, ademais dun espigón.
No seu manto principal ten bloques de 150 toneladas, e no morro colocáronse así mesmo bloques de alta densidade, de ata 195 toneladas, para asegurar unha maior protección nesta zona, que é a máis sensible.
A estrutura, que está proxectada para recibir excesos de auga do mar no caso de fortes ondadas, non sufriu estes días ningún dano, segundo destaca a Autoridade Portuaria, que subliña que esta resistencia 'valida' o seu deseño, no que participaron destacados grupos de enxeñeiros co apoio de laboratorios españois e europeos.
A Autoridade Portuaria da Coruña mantén a previsión de que as fases I e II do porto exterior conclúan o vindeiro 28 de decembro.
A explotación comercial da dársena comezará en 2012 coa chegada dos primeiros buques, ao tempo que se desenvolverán as obras da fase III, coas habilitacións das vías interiores, as explanadas e o inicio do contradique, entre outras infraestruturas.
