Critican o anteproxecto do poder xudicial e a privatización do rexistro civil e convocan unha concentración este xoves
Traballadores dos xulgados de Vigo esixiron este martes que a Administración cre un servizo de reforzo --con equipos de traballo especializados e arquiveiros-- ou prolongue as xornadas voluntarias e incentivadas para acometer os labores de expurgo dos arquivos xudiciais.
Nunha rolda de prensa, na que estiveron presentes varias decenas de traballadores, os empregados aseguraron estar "fartos de sufrir constantes ataques da administración", que repercuten, indicaron, tanto ás súas condicións laborais coma ao servizo público que ofrecen.
Así, sinalaron que cada traballador ten que deixar de acometer as súas funcións e de atender aos cidadáns para realizar o expurgo, polo menos durante unha hora ao día, tempo que, recalcaron, "non é suficiente", posto que deben rexistrar os datos correspondentes a todos os procedementos arquivados entre os anos 1977 e 2000, que oscilan entre os 1.200 e os 3.000 por xulgado e ano.
Os traballadores tamén indicaron que están a recibir ameazas "constantes" de aperturas de expedientes disciplinarios por parte do secretario coordinador e inciden en que non reciben directrices sobre como deben introducir os datos nas bases de datos.
De momento esta medida afecta aos xulgados do social de Vigo --que son cinco-- e ao de Primeira Instancia número 10, en cada un dos cales traballan entre oito e nove persoas, e se prevé que a medida se aplique en todos os demais.
O voceiro dos traballadores, Pablo Valeiras, aclarou que entenden "imprescindible" realizar o expurgo dos arquivos xudiciais porque "non hai espazo" pero criticou a actitude da administración.
Así mesmo, manifestou que realizar o expurgo implica unha nova responsabilidade, posto que, se os documentos se perden ou quedan mal recollidos, ¿quen se vai facer responsable e vai asumir a mala praxe da administración?", cuestionou Valeiras.
PROPOSTA
Por iso, esixen que a Dirección Xeral de Xustiza se poña en contacto cos sindicatos e cree un servizo de reforzo --con equipos de traballo especializados e arquiveiros-- ou se propoña a prolongación de xornadas voluntarias e incentivadas. "Calquera outra medida será rexeitada", afirmaron.
Tal e como recordou Valeiras, o decreto do expurgo foi aprobado hai 10 anos, pero, ata agora, non se fixera "nada", e en cambio "agora entra présa por facelo". "Si, hai que facelo, pero con persoal de reforzo ou a prolongación das xornadas", reiterou.
SUPRESIÓN DO PARTIDO XUDICIAL
Os traballadores tamén criticaron o Anteproxecto de Lei Orgánica do Poder Xudicial (LOPJ), aprobado o pasado venres polo Consello de Ministros, e aseguraron que tanto os traballadores como os cidadáns "van saír moi prexudicados", onde o caso de Vigo é "o máis grave pero non o único".
Neste sentido, sinalaron que a súa pretensión "non é atacar a Pontevedra", pero insistiron en que "se debe manter a definición actual de partido xudicial porque ten que haber proximidade entre a xustiza e o cidadán". Ademais, denunciaron que esta supresión suporá máis gastos e tempo para os vigueses e repercutirá na economía da cidade.
Por iso, anunciaron que levarán a cabo "medidas de presión" xunto ás demais cidades e os operadores xurídicos, e convocarán unha concentración para paralizar o anteproxecto. Esta mobilización, que tamén se posicionará contra a privatización do rexistro civil, terá lugar o próximo xoves ás 12,00 horas ante o edificio novo dos xulgados de Vigo.
