O alcalde de Vigo, Abel Caballero, anunciou hoxe que "iniciou oficialmente a andaina" para solicitar que a Xunta restitúa os "danos económicos" derivados do incremento do canon á empresa mixta de recollida de residuos urbanos Sogama.
Nunhas declaracións aos medios, Caballero criticou o "incremento importantísimo do prezo privado que se ten que pagar a Sogama", unha empresa mixta participada pola Xunta e pola enerxética privada Gas Natural Fenosa.
Así, indicou que lles solicitou aos servizos xurídicos un informe patrimonial para "eventualmente pedir o resarcimento ao Concello dos danos derivados".
Segundo o alcalde, trátase dunha modificación "lexislativa que produce prexuízos", o que debería dar a posibilidade de presentar "unha reclamación de responsabilidade patrimonial".
Por iso, cabe a eventualidade de "satisfacer os danos economicamente valorables que resultan dunha actividade lexislativa e que non existe deber xurídico de soportar por parte do Concello de Vigo".
O informe establece que "a fixación dun canon unitario por tratamento de tonelada de residuos sen considerar as situacións xurídicas individualizadas, como é a do Concello de Vigo que ten asinado un contrato cun prezo considerablemente inferior ao fixado por lei, pode supor un dano antixurídico calculable e susceptible de indemnización".
Adicionalmente, Caballero instou a Federación Galega de Municipios e Provincias a "promover a constitución dunha comisión técnica de traballo" para "avaliar a situación económica e financeira de Sogama e as alternativas de futuro posibles".
