Ordena o sobresemento do caso Naturgalia ao non haber indicios delituosos
O xuíz ordenou o sobresemento do caso Naturgalia ao non haber indicios delituosos, e aceptou así a petición do fiscal de arquivo da denuncia presentada polo Partido Popular contra o concelleiro de Facenda do Concello de Pontevedra, Raimundo González, do BNG, por suposta prevaricación e fraude na adxudicación dunhas obras.
O presidente local do PP, Telmo Martín foi o principal impulsor desta causa, segundo explicou o edil nacionalista Raimundo González polo que espera que 'algún día pida desculpas por acusar sen ningún tipo de fundamento'.
Raimundo González valorou a decisión adoptada polo xuíz quen entendeu que o caso Naturgalia era un erro administrativo 'que Telmo Martín pretendeu criminalizar', afirmou o edil do BNG. 'Telmo buscou unha estratexia política de desgaste do goberno local', censurou.
O PP local iniciara accións legais por uns feitos que se remontan ao ano 2008, cando a casa do concello encargou de forma directa á empresa Naturgalia o acondicionamento dos xardíns da Praza da Liberdade e a construción dunha rotonda na rúa Loureiro Crespo.
Meses máis tarde se intentaron regularizar esa adxudicación abrindo un expediente de contratación para unhas obras que foran executadas nove meses antes.
Tras a denuncia popular, o xulgado abriu dilixencias e citou a declarar como imputados ao concelleiro de Facenda, Raimundo González Carballo e a un funcionario municipal. Esta citación produciuse un mes antes das eleccións municipais do 22 de maio.
'PERVERSO'
'É perverso', dixo Raimundo González e engadiu que 'hai outros mecanismos políticos para actuar sen contribuír ao colapso dos xulgados nin á mala consideración da clase política'. 'Non o conseguiu porque houbo unhas eleccións despois disto e o PP fracasou', concluíu.
'Esta denuncia nunca foi crible para a maioría dos cidadáns', incidiu o edil de Facenda, que afirmou recibir durante todo este tempo numerosas mostras de apoio 'de xente do Partido Popular' porque 'ten que funcional o sentido común'.
