Unha historia maxistral

A partir da reedición (1981), da segunda edición, de 1975, Editorial Galaxia, posuídora dos dereitos de Carvalho Calero, cando aínda era Carballo, lanzou este ano, o que ía ser do Mestre ferrolán, (haberá que recuncar o vindeiro, por causas ben coñecidas), a facsímile de Historia da literatura galega contemporánea. Se cadra o maior “tour de force” das nosas letras, coidando sobre todo en que cando se concebira internet non soamente non existía senón que daquela, cando se falaba do futuro, este traía con el autos voadores e cousas así. Ou sexa, nada de fichas de autores fornecidas pola Wikipedia, senón un traballo de campo, de rato de biblioteca, de furón de hemerotecas, tan intenso como desagradecido. Entre outros por tantos como lle negaron durante dúas décadas a Carvalho o Día das Letras, sendo como son debedores do volume do ferrolán. Un volume, nas súas dimensións, manexable. Que vai desde os folgos literarios que producirá a guerra contra dos franceses ata a análise da propia xeración de Carvalho. E isto porque tal lle encomendara Ramón Piñeiro, grande valedor da nosa literatura nos anos escuros. Aqueles que botaran en parte ambos, Piñeiro e Carvalho, nos presidios do rexime. Que a cousa non viña nada doado para os resistentes. Así Carvalho Calero, tan teimoso e testudo como para forxar compendio tan amplo, nos saberes literarios, como volve propoñernos Galaxia. Neste ano que ía ser de Carvalho mais que, por razóns obvias, terá de repetir o seu curso. Porque moitos foron os libros, novos, rededicións, ao redor deste Mestre singular das nosas letras. Mais mancoulles o espallamento en vivo, tamén nas escolas pechadas o 17 de Maio. Si, estaba a telemática, pero non, ¿para que enganarnos? Á parte, naturalmente, os libros, narrativa, poesía, teatro, ensaio do propio Don Ricardo. Sendo a guinda, broche ou ramo este tratado, no que abondarían os miniensaios sobre Rosalía, tan anovador no seu momento, Eduardo Pondal ou Curros Enríquez. Ah, pero que ademais hai toda unha chea de datos, minibiografías, estudos sobre tantos e tantos autores como foron cerne e base para que a nosa literatura siga existindo. Carvalho Calero, tamén, malia o desprezo de certa xentiña..