A independencia de Javier Cercas

Que Javier Cercas é un cidadán que lle boto peito á vida non ten dúbida. Próbaao que sendo residente en Cataluña manteña posición públicas diverxentes desa metade de poboación, máis ou menos, a prol da independencia que proclama o último libro do novelista nado en Ibahernando. Ora, compre igualmente dicir que o título semella enganoso. Porque pouco independentismo hai nesta novela políciaca, protagonizada polo mesmo policía, Melchor Marín, de “Terra Alta”, libro que lle dera a Cercas o Premio Planeta, quen volve para resolver o chantaxe ao que está sendo sometido, por mor dun vídeo sexual que lle gravaran, subrepticiamente, cando era nova, a alcaldesa de Barcelona. Pouco que ver tampouco con Ada Colau, que a edila de Cercas ten diferente orientación política, ambigua, a falar con uns e con outros segundo sopre o vento ou baixe o río. Mais esa pescuda pola banda de Melchor, ten tamén que ver co seu movemento contino tentando bater cos asasinos da súa propia nai, prostituta morta ben nova, o que non sería atranco para que Melchor Marín saíse adiante, iso si, logo de pasar el mesmo polo cárcere, onde tivo ocasión de atopar elementos que aquí se deixan ver, e que de algunha maneira han axudar no seu progreso a un elemento policial tan cheo de luces e sombras cal Melchor Marín, viúvo recenté con filla ao seu coidado. Unha mociña con nome cal fuxido do Victor Hugo, de “Les miserables”, como Cosette. A partir deste enguedello, trufado cunha panda de rapaces “pijos” a facer falcatruadas, e elementos políticos, algúns enredando no avispeiro político catalán, Javier Cercas artella unha novela eficaz, que se deixa ler moi ben, na que se percibe unha certa présa escritora, e que ás veces ten cousas de “grand guignol”. É un remate do máis épico, homérico, se se quere, hiperbólico, xa que logo, por definicíon, o que pon en común esta novela con outras do chamado xénero “negro”, máis que do deductivo. Así e todo “Independencia”, con acertos e erros, demostra que Javier Cercas non soamente é quen de escribir narracións apegadas á realidade, senón que a ficción pura e dura tamén vai no seu xen. De escritor extremeño residente en Cataluña, de expresión en castelán ou español, mesma cousa. Libro: Independencia Autor: Javier Cercas Editorial: Tusquets Precio: 20,80 euros.