O BNG de Verín presenta unha candidatura ampla e interxeracional

29/abr./23 - 23:23

Diego Lourenzo, tenente alcalde de Verín, encabeza a lista nacionalista e presentarase á alcaldía o vindeiro 28 de maio

A candidatura do Bloque Nacionalista Galego de Verín para o vindeiro 28 de maio é “a mellor opción para liderar o próximo goberno municipal”, anotan sobre unha candidatura con “forza” pola pluralidade e calidade das persoas que a compoñen. Persoas que representan a “todo o tecido social da nosa vila e que se achegan ao BNG para sumar forzas neste proxecto”, sinala Diego Lourenzo, actual tenente alcalde de Verín e cabeza de lista do BNG verinés.

A candidatura, integrada por 27 persoas é “interxeracional e combina a experiencia de dous mandatos coa incorporación da mocidade comprometida que encama o futuro, e que como tal debe estar representada na política municipal”, apuntan os nacionalistas. Apostamos por persoas independentes, pois suman unha visión aberta e plural da sociedade verinesa. Verín é diverso e polo tanto a candidatura que represente á vila tamén debe selo”, engade o candidato á alcaldía.

Ao longo destes anos, a xestión do BNG impulsou a “dinamización cultural de Verín, apostou pola formación e a educación como eixo vertebrador para o futuro e puxo en valor o traballo asociativo dos colectivos sociais”, din, conscientes de que “queda moito por facer, e o noso obxectivo é continuar avanzando no cambio e transformación que iniciou Verín”.