María de los Ángeles González: "Verín é un referente no sector do transporte, moita xente vive del"

María de los Ángeles González, máis coñecida como Anxos, é a nova presidenta da Asociación de Transportistas do Parking de Verín (Atraparve). Así o decidiron os seus socios nunha asemblea o pasado mes. Anxos é a primeira presidenta muller da asociación. E non só ela, a vicepresidenta escollida tamén foi unha muller: Nieves Salgueiro. Na votación participaron 31 dos 69 socios de Atraparve, e foron 30 os que votaron a favor de Anxos e Nieves ao fronte dos transportistas verineses. Xa pasou un mes dende a votación. Que sinte ao ser a presidenta de Atraparve? É un orgullo, pero o sentimento máis importante é a responsabilidade de conseguir para o sector as medidas que sexan máis beneficiosas, ademais de que estas perduren no tempo. Por que decidiu presentarse á candidatura? Necesitábase unha continuidade da asociación despois da dimisión da anterior xunta directiva -tras as recentes folgas dos transportistas- para non perder todo o traballo e as reivindicacións que levaban facendo estes catro anos atrás. Verín é un referente no sector do transporte porque viven moitas familias del, ben sexan condutores ou empresarios. É a primeira muller presidenta de Atraparve, é algo novo… Así é aquí, e para min supón un reto, é unha gran responsabilidade. Pero a muller xa ten presenza en máis lugares. Dentro da Federación na que estamos, hai unha asociación en Castellón e outra en Madrid que están presididas por mulleres. A vicepresidenta de Atraparve tamén é muller, Nieves Salgado. Cal vai ser o seu traballo agora? Imos a seguir coa mesma dinámica que a anterior directiva, xa que a formulación e dinámica de traballo que teñen está moi acertada. Sempre procuraremos ir na liña de mellorar, pero tomando como referencia o que xa está feito, sen esquecelo. E máis alá do papel de presidenta, vostede conduce o camión? Son camioneira dende hai moitos anos, actualmente só traballo a nivel nacional pero anos atrás andabamos, sobre todo, facendo rutas a Francia e Italia. Cando un traballo che gusta, non resulta para nada complicado. Eu vivino e aprendín o oficio dende nena, veño dunha familia con máis de 40 anos no sector. Considera que a situación está difícil? Non nos podemos amparar nas dificultades. Hai que saber loitar e reciclarse. Entón, cal cree que é o futuro do transporte? É certo que o futuro inmediato está complicado, pero como digo, como está a acontecer noutros sectores, non temos un relevo xeracional claro e isto está causando preocupación. No que atinxe ás mulleres, dende o meu punto de vista vai haber un longo percorrido para que as mulleres veñan ó sector, iso si, gustaríame que a 10 anos vista houbera máis mulleres neste “mundillo”. E para rematar, como ve o futuro de Atraparve? Eu son optimista, dende a creación de Atraparve a intención é concienciar ós socios do concepto de asociación para que non a consideren unha institución duns poucos, e niso estamos, que os nosos socios vexan que Atraparve somos todos.