A proba celebrarase este domingo, a partir das 10.00 horas, cun percorrido de 18 quilómetros
Onte presentouse no Pazo Provincial da Deputación de Ourense a terceira edición da andaina "Viño de Monterrei". No acto estiveron presentes o deputado provincial de Deportes, Juan Anta; o asesor de Deportes da Deputación; Bernardino González; o alcalde de Monterrei, José Luís Suárez; o concelleiro Marcos Meno, e a membro da cooperativa Xeitura Begoña Garrido.
"Este tipo de iniciativas poñen en valor o territorio e neste caso, o seu produto estrela, o viño, a través do deporte", afirmou Juan Anta, quen sinalou a importancia destas probas "como ferramenta para promocionar o noso rural".
O rexedor montederrense explicou que o obxectivo desta andaina é "mesturar o deporte coa posta en valor do noso abundante patrimonio artístico, cultural e natural".
Entre as novidades desta edición atópase a realización "dun único percorrido de 18 quilómetros" e que "todos os inscritos poderán levar aos seus rapaces co obxectivo de fomentar o deporte en familia". A proba celebrarase o vindeiro domingo a partir das dez da mañá.
