A Fundación Insua dos Poetas organiza para mañá a III Andaina Cultural Camiño de Nós, que nesta ocasión será entre Carballiño e O Irixo. A hora de partida é as 10,00 horas, desde o cruce de Ribadavia pola rúa principal e dirixíndose á Insua dos Poetas, onde os camiñantes reporán forzas antes de continuar o percorrido.
Esta andaina teatralizada recorda que en xullo de 1926 un grupo de sete galeguistas de Ourense, todos membros do Seminario de Estudos Galegos, fixeron a pé o traxecto entre Ourense e Santiago (105 km), seguindo un itinerario coñecido desde a Idade Media como Camiño dos Arrieiros, recollido na Carta Geométrica de Galicia de Domingo Fontán.
Este camiño atravesa un total de 11 concellos, 5 da provincia de Ourense, 3 da de Pontevedra e 3 da Coruña: Ourense-Carballiño, Carballiño-Silleda, Silleda-Ponte Ulla e Ponte Ulla-Santiago, e foi recollido por Xavier Pardo Bedia no periódico A Nosa Terra, órgano das Irmandades da Fala.
En 2020, ano do centenario da revista Nós, Luís González Tosar, presidente da fundación, recolleu no libro “O Camiño de Nós”, con fotos de Xulio Gil, as sete narracións de Xavier Pardo e outros materiais do histórico itinerario. Constituída a Asociación de Concellos do Camiño de Nós en 2021, a Fundación Insua dos Poetas, cuxo predio atravesaron os ilustres camiñantes, vén organizando desde esa data a andaina.
