O Concello de Carballeda de Avia acollerá un plan piloto promovido pola Xunta que combinará os pasteiros con diversas iniciativas de mobilización de terras. Así se acordou na reunión que mantivo o conselleiro do Medio Rural, José González, co alcalde da localidade, Luis Milia.
Así, a aldea modelo de Muimenta contará cun rabaño de cabras que se encargará de rozar a contorna á espera de que se defina o produtor ou produtores que se establecerán na zona. As cabras tamén se empregarán para o mantemento das faixas secundarias en varias aldeas que resultaron afectadas polos incendios de 2017, co obxecto de previr lumes forestais.
O plan piloto conta tamén con promover pastos e outras aldeas modelo, conectando ambas fórmulas entre si polos proxectos produtivos. Outra das principais iniciativas que se prevé é un polígono para a plantación de viñedo.
O encontro do conselleiro e o alcalde tamén serviu para avanzar na participación do monte Vilar de Condes cun proxecto europeo de cooperación transfronteiriza entre España e Portugal en materia de incendios forestais ao abeiro do que se busca implementar unha serie de modelos de xestión nos que se combina a mellora do aproveitamento do espazo forestal e da biomasa coa xeración de emprego e o desenvolvemento económico.
