A Xunta de Goberno local do Concello de Ribadavia aprobou por unanimidade a normativa pola que se regula a convocatoria e elaboración das listas para a provisión temporal de postos de traballo de Auxiliar de Axuda no Fogar. O obxecto da normativa é regular a convocatoria e elaboración de listas con aquelas persoas interesadas na cobertura, con carácter temporal.
A súa selección considérase de urxente necesidade como consecuencia de vacantes e baixas laborais das persoas que desempeñan estes postos, mentres non sexan ocupadas polo correspondente persoal fixo, no caso de ser necesario.
Entre os requisitos figura ser español ou dun estado membro da Unión Europea; ter cumpridos 16 anos de idade e non alcanzar a idade de xubilación; estar en posesión do título correspondente de auxiliar e non padecer enfermidade ou defecto físico que impida o desempeño das correspondentes funcións, entre outros.
Os interesados deberán presentar a relación de méritos e de requisitos debidamente documentados, xa que se terá en conta a experiencia profesional, os servizos prestados por conta propia, a experiencia profesional en praza ou posto de igual contido no ámbito da Administración Pública, ademais de cursos formativos, entre outros.
O obxectivo do Concello é dispor dunha bolsa de emprego á que recurrir para a prestación do servizo de axuda no fogar.
