O Camiño Miñoto Ribeiro reforza a súa base científica no trazado luso coa creación do grupo oficial de investigadores da ruta xacobea en Portugal. Está dirixido polo historiador Castor Pérez e conta co apoio das cámaras portuguesas entre Melgaço e Braga.
Os obxectivos do grupo son fundamentar a ruta desde Cebide, en Melgaço, ata Braga. Trátase de consolidar a base científica do tramo luso, tal e como xa se fixo na parte galega.
O grupo empezou xa a traballar co material achegado polo historiador galego e as primeiras pescudas dos técnicos lusos despois da reunión da pasada semana na sede da Cámara de Melgaço onde se deu un novo impulso ao restablecemento da ruta xacobea.
"O material de traballo será a documentación medieval que se conserva e o labor de campo dos investigadores designados polas institucións portuguesas", segundo apunta o presidente da Asociación de Concellos do Camiño Miñoto Ribeiro, Avelino Luis de Francisco. A próxima reunión de traballo será o día 8 en Melgaço.
