As xornadas de formación inclúen unha mostra internacional de viños da biodiversidade
Máis de 60 alumnos participan nas Xornadas de formación de viticultura ecolóxica e biodinámica, que comezaron onte no Auditorio do Concello de Castrelo de Miño e que se prolongarán en horario de mañá e tarde no día de hoxe. Os participantes proceden de diversos puntos de Galicia, Portugal e da Rioja Alavesa e moitos deles hospédanse estes días no albergue municipal do Parque Náutico.
Os docentes das xornadas son André Rodrigues Henriques da Silva e Pablo Ortigueira Sánchez, que abordan temas relativos ós factores de calidade; distintos manexos con elementos mecánicos e animales; biofertilizantes; micorrizas e sobre o manexo de pragas e enfermidades na produción ecolóxica, entre outros.
Como complemento das xornadas formativas, para mañá está prevista a I Mostra Internacional de Viños da Biodiversidade, no Parque Náutico de Castrelo. Alí teñen cita máis de 26 adegas galegas, españolas e portuguesas, que darán a coñecer os seus viños. O público poderá probar as distintas marcas pagando cinco euros, e en horario de 11,00 a 14,00 horas e de 16,00 a 20,00 horas.
A feira persigue ser tamén un punto de encontro de viticultores, adegueiros e profesionais da vitivinicultura para o intercambio de experiencias e traballos.
A actividade está organizada polo Concello de Castrelo de Miño e o Sindicato Labrego Galego, que sinalan que é "a primeira feira que se celebra en Galicia de viticultura ecolóxica e biodinámica".