24 horas de confesións e rezos durante a Coresma en Ourense

Atopar o sentido da vida, confesarse ou rezar foron algunhas das motivacións que enmarcaron o evento de portas abertas do templo expiatorio do Sagrado Corazón de A Carballeira. O programa, coñecido polo nome de “24 horas para el Señor”, foi unha iniciativa promovida polo papa Francisco que pretendía ofrecer aos fieis a oportunidade de prepararse durante a Coresma para recibir a Pascua, a calquera hora do día . A xornada de intensos rezos deu comezou o pasado venres ás 19,00 horas cunha misa. Unha hora despois achegáronse diversos grupos como o de Jóvenes-Seminario Menor, Emaús Mujeres ou o Seminario Mayor Divino Maestro para ofrecer cánticos, confesarse ou rezar ata as 23,00 horas. A media noite produciuse unha adoración nocturna ao Santo e rezouse o rosario. Pero o maior protagonismo e traballo litúrxico da madrugada foi para un grupo de relixiosas da igrexa. Na xornada do sábado, o párroco Álvaro Fernández Fidalgo, abriu os turnos de oracións da mañá. Os fieis que se puideron achegar ata as 11,30 horas puideron acompañar os seus rezos xunto cos actos relixiosos programados do Seminario Redemptoris Mater, a Cofradía Jesús Nazareno ou a meditación-ametur de señoras. Media hora despois comezou o Rosario-Hospitalidad de Lourdes. Un momento que destacou pola constante entrada e saída da xente. Segundo o párroco Fidalgo, “os fieis non entran en masa, pero si que hai unha acollida positiva”, expresa. O párroco asegura que dende a pandemia non se realizara este “formato intensivo de 24 horas, a nivel de diócesis” e iso pode dar unha explicación a que “tanta xente se achegara, a pesar do mal clima”, indica. Un aura de plena solemnidade e fe rodeaban ao Santo ao que adicaban as oracións e cánticos. Porén, un sempre podía achegarse para atopar un momento de descanso e atopar simplemente paz. “Primeiro é convertirse un e logo confesarse. Dá igual se eres crente ou non. No caso da xente que non cre en Deus é cambiar de vida, de hábitos, crecer como persoa. No caso dos fieis teñen o aliciente de que Deus nolo esixe, especialmente na Coresma para prepararse para a Pascua”, explica Fidalgo. Estas 24 horas “tiveron unha cor especial” e as sesións de liturxia deron peche cunha misa final que contou coa presenza do bispo de Ourense ás 19,00 horas da tarde de onte.