Ana Pontón prometeu reforzar o CHUO con “verdadeiras unidades de ictus e xeriatría” e avanzou que impulsará a estabilidade laboral do seu persoal, ademais de garantir a defensa do rural garantindo “prezos xustos” para produtores “reducindo a burocracia”. Así o dixo a candidata do BNG no mitin central desta campaña en Ourense, celebrado nun ateigado anexo do pavillón dos Remedios, no que sinalou que “é hora de que Ourense deixe de perder e comece a gañar” cun goberno que teña un “proxecto de país” e remate coa “discriminación de Ourense e Galiza”.
A candidata nacionalista chamou a cidadanía a “apostar por algo diferente” para obter “resultados diferentes” e, para iso, ofreceuse como unha presidenta “coas más libres” que gobernará da man da xente e defendendo os servizos públicos. “Sei moi ben quen son, para que estou aquí e a quen me debo. Eu débome á xente que defende a sanidade pública”, proclamou Pontón, facendo bandeira do tema sanitario, que centrou gran parte da súa intervención. “O goberno do PP converteuse nun perigo para a saúde dos ourensáns”, advertiu a nacionalista.
Compromisos con Ourense
Un dos seus grandes compromisos con Ourense é “resolver todos os problemas que ten o seu complexo hospitalario, empezando pola precariedade e a sobrecarga que impón o PP”. Nese senso, garantiu que potenciará os contratos estables e porá en marcha un plan de formación e de investigación para estabilizar o persoal médico. Ademais, avanzou que o CHUO vai contar con “verdadeiras” unidades de xeriatría e de ictus, “porque non é normal” que careza delas malia a ateender a unha das zonas coa poboación máis envellecidas.
No eido sanitario, avanzou que o BNG construirá “por fin” un centro de saúde no Vinteún, “unha infraestrutura que o PP aparcou pese a que xa fora aprobada nos anos nos que o BNG formou parte do Goberno galego.
Pontón aproveitou que agricultores e gandeiros acudiron ao mitin para protestar en contra da política agraria europea para reiterar o seu compromiso de defender o rural “de todas aquelas medidas que se tomen en contra dos nosos produtores, en Madrid ou en Bruxelas”, así como a garantir prezos xustos e reducir burocracia, “porque estamos falando de explotacións agrogandeiras, non de xestorías”.
A candidata reafirmou o compromiso de seguir defendendo o dereito dos gandeiros e produtores “a vivir do seu traballo e con prezos xustos” porque, advertiu, “non é normal que a xente do noso medio rural faga o traballo duro e encha a neveira das nosas casas con alimentos de calidade, pero sexan outros os que quedan cos beneficios”.
Por último, pediulle ao candidato do PP, Alfonso Rueda, que “deixe de esconderse” e acuda tanto ao debate de TVE como a un cara a cara coa líder da oposición, “o mínimo en democracia, como demostraron Pedro Sánchez e Feijóo nas pasadas eleccións estatais”. Para Pontón, o problema de Rueda é que “non ten nin programa nin ideas e por iso prefire esconderse”.
“Nin proxectos importados nin localismos estériles”
“Quen pode marcar a diferenza para sacar adiante Ourense é o BNG”, dixo no mitin a cabeza de lista por Ourense, Noa Presas, que pediu a confianza dos ourensáns para poñer en marcha “unha Galiza mellor na que non haxa galegos de primeira e de segunda” porque, se hai unha parte do país que máis precisa un cambio político “é Ourense”, salientou. “E e queremos rematar coa discriminación de Ourense hai que rematar coa discriminación de Galiza”, engadiu. Reclamou así a un proxecto no que o equilibrio territorial e cohesión social son centrais: “Sabemos que se alguén pode sacar adiante Ourense é o BNG. Quen pode marcar a diferenza é un goberno de cambio liderado por Ana Pontón, unha muller que sabe o que hai que facer e como hai que facelo”.
Presas chamou a concentrar o voto na papeleta do BNG na provincia para “fuxir de proxectos políticos importados doutras latitudes e de localismos estériles que disfrazados de amor a Ourense só serven para alimentar intereses individuais”.
