Asegurou que a sentenza terá o valor que lle queiran dar os cidadáns "no momento de depositar o seu voto nas urnas".
O presidente da Deputación de Ourense, Manuel Baltar, considera que a sentenza que ratifica os 9 anos de inhabilitación para o seu pai, José Luis Baltar, que foi responsable da institución provincial durante máis de dúas décadas, "non terá peso" político e xa confía, independentemente do pronunciamento, nunha "gran maioría" do PP.
Antes de participar no acto inaugural da "III xornada sobre o futuro das provincias", o presidente ourensán asegurou nunhas declaracións aos informadores que "politicamente" a sentenza terá o valor que lle queiran dar os cidadáns "no momento de depositar o seu voto nas urnas".
Mais "xa dixen onte que non ía ter peso de ningún tipo", proclamou Manuel Baltar, quen non desaproveitou a oportunidade de prognosticar unha "gran maioría" para o Partido Popular no 24 de maio nas eleccións.
Canto á sentenza, mostrou, como fixo noutras ocasións, o seu "absoluto respecto aos procedementos e ás resolucións xudiciais" de calquera tipo.
Baltar pronunciouse así despois da sentenza ditada pola sección segunda da Audiencia Provincial de Ourense, que ratifica os nove anos de inhabilitación especial para emprego ou cargo público para o ex presidente da Deputación de Ourense, José Luis Baltar Pumar, por un delito de continuado de prevaricación, pena que lle fora imputada en xullo do ano pasado polo Xulgado do Penal Número Un.
No auto facilitado polo Tribunal Superior de Xustiza de Galicia (TSXG), a sala desestima os recursos de apelación presentados polo letrado de José Luis Baltar, tras descartar que se producise "indefensión material na tramitación do proceso" de acordo co contido da investigación preliminar practicada polo ministerio fiscal.
Sustentábase para iso en que en ningunha das 104 contratacións -que se investigaban- se produciu fiscalización previa, real oferta de emprego nin a máis mínima selección obxectiva; un feito do que era coñecedor o ex presidente da Deputación ourensá.
A Audiencia Provincial ratifica así a condena ditada polo Xulgado do Penal, unha sentenza contra a que non cabe recurso.
