O Concello de Barbadás e SEA (Suelo Empresarial del Atlántico) traballan para dar impulso ao parque empresarial de Barbadás. Os técnicos da sociedade estatal estudarán “a fondo” a súa viabilidade. O polígono tería unha situación estratéxica, ao carón da estrada OU-540 e a escasos dous quilómetros do acceso á autovía A-52.
Este “valor engadido” trasladoullo o alcalde de Barbadás, Xosé Carlos Valcárcel, á xerente de SEA, Beatriz Sestayo, nunha reunión na Casa Consistorial nunha xuntanza na que tamén estiveron o tenente de alcalde, Victoria Morenza; e o concelleiro de Promoción Económica, José Manuel Morgade. Barbadás conta cun Plan de Urbanismo con solo dispoñible e o parque industrial é “moi demandado”, dixo o rexedor, xa que dinamizará a economía da zona, revalorizará Barbadás a nivel empresarial e reforzará a súa actividade económica”. O rexedor tamén insistiu na situación estratéxica na que se emprazarán as instalacións.
Neste mesma liña pronunciouse o concelleiro de Promoción Económica, José Manuel Morgade: “Seguiremos traballando para facer realidade este proxecto do parque industrial de Barbadás, que regularizará a situación das empresas da zona e xerará solo industrial no que poderán instalarse novas firmas que dinamizarán a economía da zona”. Tal e como se contempla no proxecto para a construción do parque empresarial, o acceso emprazarase ao sueste, nas proximidades do enlace existente da estrada OU-540 coa vía municipal. Para facilitar a mobilidade permitindo os xiros á esquerda, este enlace transformarase nunha glorieta que permitirá o acceso ao polígono. Os percorridos organizaranse a través da vía municipal norte e a través da vía de servizo da estrada autonómica, que se transforma nunha vía de dobre sentido. Está previsto reservar máis dun 20 % da superficie para espazos verdes.
